Ата Заң – еркін өмірдің кепілі
Қазіргі қоғамда жастардың белсенділігі – мемлекеттің дамуы мен болашағының басты көрсеткіштерінің бірі. Жас ұрпақ ел өміріне араласып, қоғамдық жұмыстарға қатысып, түрлі бастамалар көтеру арқылы қоғамның қозғаушы күшіне айналып келеді. Осындай белсенділіктің негізінде конституциялық құндылықтарды құрметтеу мен заңға бағыну мәдениетін қалыптастыру маңызды.
Қазақстан Республикасының Конституциясы – еліміздің негізгі заңы және тәуелсіздігіміздің берік тірегі. Конституцияда әр азаматтың құқықтары мен бостандықтары, міндеттері мен жауапкершілігі айқын көрсетілген. Жастар осы құндылықтарды терең түсініп, күнделікті өмірде ұстанғанда ғана әділетті әрі дамыған қоғам қалыптасады.
Бүгінде жастар арасында патриоттық бағыттағы іс-шаралар, пікір сайыс турнирлері, еріктілік қозғалыстары, құқықтық сауаттылық кездесулері жиі ұйымдастырылуда. Мұндай шаралар жас буынның азаматтық көзқарасын қалыптастырып, елге деген жауапкершілігін арттырады. Әсіресе, Конституцияны насихаттау бағытындағы түсіндіру жұмыстары жастардың заңға құрметпен қарауына оң әсер етуде.
Конституциялық құндылықтардың негізгі мақсаты – ел бірлігі мен тұрақтылығын сақтау. Татулық, теңдік, адам құқықтарын құрметтеу, заң үстемдігі секілді қағидалар қоғамдағы келісімнің негізі болып саналады. Жастар осы ұстанымдарды қолдап, қоғамда белсенділік танытқанда мемлекет те нығая түседі.
Қорыта айтқанда, жастардың белсенділігі мен конституциялық құндылықтарды дәріптеу – болашаққа бастар маңызды қадам. Саналы, білімді әрі белсенді жастар – елдің жарқын келешегінің кепілі.
Нұргүл МАЖИТ,
аудандық Жастар ресурстық орталығының инспекторы.
