Кітапханада семинар-практикум өтті
Жуырда Ұлытау ауданы орталықтандырылған кітапханалар жүйесінің əдістемелік-библиографиялық бөлімінің ұйымдастыруымен ауыл, кент кітапханашылары арасында «Кітапханалық ақпараттық кеңістікті дамыту» тақырыбында семинар-практикум өткізілді. Іс-шара барысында Ұлытау ауданының орталықтандырылған кітапханалар жүйесі КММ директоры Салтанат НИЯЗОВА сөз сөйлеп, кітапханашыларға сəттілік тіледі.
«Кітапхана терминдерінің жаңа сөздігі», «Кітапханашылар арасында Kahoot бағдарламасы бойынша – блиц турнир» тақырыбында əдістемелік-библиографиялық бөлім меңгерушісі Сандуғаш Ерғазықызы, «Кітапханадағы жаңа инновациялық көпшілік жұмыс формалары», «Сайт туралы ақпарат» тақырыбында кітапхана əдіскері Гүлім Баймағанбетова, «Kahoot платформасын қолдану əдісі» мен «Quiz» интеллектуалды ойынын ұйымдастырған балалар кітапханасының библиографы Марина Елеуова, «Кітапхана қорын есептеу» комплектования бөлімі кітапханашы-редактор Жеңіскүл Орынбаева, «Кітапхана коталогтары: алфавиттік жəне жүйелік» кітапхана комплектаторы Жанат Мұханбетова слайд жүзінде практикалық кеңестер мен түсіндірме жұмыстарын жүргізді.
Семинар соңында əдістемелік-библиографиялық бөлімнің ұйымдастыруымен «Оқитын өлке-2023» жобасы құрылған жоба қорытындыланып, жеңімпаздар анықталды.
Бұл жобаның міндеті – жоба аясында кітап оқуды ілгерілету, іс-шаралардың жоспарға сəйкес барлық кітапханаларда ұйымдастырылуын қадағалау жəне талдау жасау, əлеуметтік желілер мен БАҚ арқылы көпшілікті ақпараттандыру, кітапханаға оқырман тарту жəне олардың қызығушылықтарын арттыру, жаңаша жұмыс түрлері арқылы анықтау.
«Оқитын өлке» жобасы аясында өткізілген сайыстарды қорытындылауға, марапаттауға арнайы əділқазылар алқасы сайланды. Қазақстан Журналистер Одағының мүшесі, «Ұлытау» газетінің Бас редакторы Альмира Мақсұтқызы, Ұлытау аудандық оқушылар үйінің «Алтын ине» үйірмесінің жетекшісі Күлəн Нұрсапақызы, жерлесіміз, Қазақстанға белгілі блогер Айдос Есілбайұлы жеңімпаздарды анықтап, құттықтау сөз сөйлеп, алғыс хаттар жəне бағалы сыйлықтармен марапаттады.
«My favourite book I read» акциясы аясында кітапхананың тұрақты оқырмандары (13- 15 жас аралығы) сүйікті кітабына 3 минуттық буктрейлер жасады. Мақсаты – жасөспірім оқырмандарды көркем шығармалар оқуға шақыру, кітапты бағалау, жақсы мен жаманды түсінуге жəне кітап таңдап, талғап оқи білуге, оны түсіну мен түйсінуге тəрбиелеу. Буктрейлер жасаудан Бас жүлдені Сарысу ауылдық кітапханасы, І орынды Қаракеңгір ауылдық кітапханасы, ІІ орынды Ақтас кенті кітапханасы, ІІІ орынды Ұлытау аудандық балалар кітапханасы иеленіп, бағалы сыйлықтар мен Алғыс хаттар табысталды. Видеокөрсетілімдер əлеуметтік желілерге жарияланды.
Жерлесіміз, жазушы, публицист Баубек Бұлқышевқа арнап «Тау ұланы» ауданаралық Баубек оқулары мəнерлеп оқу сайысы өткізілді. Мақсаты – ақынның шығармашылығын насихаттау, өлеңдерін, өнегелі өсиеттерін дəріптеу. Ақынның шығармаларын ұрпаққа таныту, оның жырларын өшірмей, мəңгілікке бойларына сіңіру, өскелең ұрпақты қайсарлыққа, батылдыққа тəрбиелеу. Еліне, жеріне деген патриоттық сезімін қалыптастыру. Сайысқа Ұлытау ОКЖ жəне ауданға қарасты Аманкелді, Егінді, Шеңбер, Сарысу, Қарсақбай, Қаракеңгір ауылдық кітапханаларының 14-15 жас аралығындағы оқырмандары қатысты. Сайыстың талабы ақын Б.Бұлқышевтың 15 өлеңін мəнерлеп жатқа айту. Бас жүлдені Егінді ауылдық кітапханасының оқырманы Жанбота Болатқызы жеңіп алса, І орынды Аманкелді ауылдық кітапханасының оқырманы Айкүн Ардаққызы, ІІ орынды Таңшолпан Дулатқызы, ІІІ орынды Сарысу ауылдық кітапханасынан Жанель Дəулетқызы жəне Ұлытау аудандық балалар кітапханасының оқырманы Тоғжан Уахитқызы жеңіп алды. Қалған қатысушылар қатысқаны үшін ынталандыру сертификаттарына ие болды.
Сонымен қатар жоба аясында жүннен жасалған бұйымдардан аудан, ауыларалық қолөнер сайысы өткізілді. Мақсаты – қазақ халқының ұмытылып бара жатқан мəдени мұрасын жаңғырту, ұлттық дəстүрімізді жалғастыру. Халықтың дəстүрлі қолөнері мəдениетінің қазыналарын жинап, қолөнер шеберлерінің бұйымдарын жəне өздерін видеоға түсіру арқылы, қолөнерге тəн аса құнды тəжірибелері мен дəстүрлі бұйымдардың жасалу жолдарын үйрену, əр өңірдің қолөнері бұйымдарын салыстыра отырып, зерттеу. Бұл сайыста бас жүлдені Қаракеңгір ауылдық кітапханасы, І орын Сарысу ауылдық кітапханасы, ІІ орын Мибұлақ ауылдық кітапханасы, ІІІ орын Жезді кенті кітапханасына бұйырып, бағалы сыйлықтар мен Алғыс хаттар табысталды.
Сандуғаш ДҮЙСЕНБАЕВА,
Ұлытау аудандық орталықтандырылған кітапханалар жүйесі əдістемелік бөлімінің меңгерушісі.
