Кәсіптік білім мен еңбек беделі артып келеді

Мемлекет басшысының тапсырмасына сәйкес 2025 жыл – Жұмысшы мамандығы жылы деп жарияланғаны белгілі. Осыған орай, Ұлытау облысында кәсіптік білім беру, техникалық кадрларды даярлау және жұмысшы мамандықтарының беделін арттыру бағытында ауқымды жұмыстар атқарылуда.

КӘСІПТІК БІЛІМ – ЕҢБЕК НАРЫҒЫНЫҢ НЕГІЗІ

Облыстағы техникалық және кәсіптік білім беру ұйымдарында биыл 5 мыңнан астам студент білім алуда. Жұмысшы мамандықтарына сұраныс артып келе жатқаны байқалады. «Жұмысшы – ел тірегі» қағидасын басшылыққа ала отырып, облыстағы колледждер мен оқу орталықтары еңбек нарығына қажетті мамандарды даярлауға ерекше назар аударып отыр.
Ұлытау, Жезқазған және Қаражал қалаларындағы колледждерде металлург, дәнекерлеуші, электрші, жол жөндеуші, тігінші, аспаз, механик, ауыл шаруашылығы технигі сынды 40-қа жуық жұмысшы мамандық бойынша оқыту жүргізілуде.
Сонымен қатар, жұмыс берушілермен бірлескен дуальді оқыту жүйесі енгізіліп, студенттердің 60%-ы тәжірибеден нақты өндірістік ортада өтуде.

ӨНДІРІС ОРЫНДАРЫМЕН ӘРІПТЕСТІК АРТЫП КЕЛЕДІ

Жергілікті кәсіпорындармен және ірі өндіріс орындарымен (Қазақмыс, Қазмырыш, Kazakhmys Maintenance Services) бірлескен оқыту және жұмыспен қамту келісімдері жасалды. Бұл өз кезегінде жастарды оқу орнын бітіре сала тұрақты жұмыспен қамтуға мүмкіндік береді.
Биылдың өзінде 300-ден астам жас жұмысшы облыс кәсіпорындарына тұрақты еңбекке орналасып, алғашқы еңбек жолын бастап кетті. Сонымен қатар, Ұлытау ауданы мен Жаңаарқа, Қаражал өңірлерінде мобильді кәсіби курстар ұйымдастырылып, ауыл жастарына қысқа мерзімді техникалық оқыту курстары ұсынылды.

«ЖҰМЫСШЫ – МӘРТЕБЕЛІ МАМАНДЫҚ» ЖОБАСЫ ЖҮЗЕГЕ АСТЫ

Облыста жыл бойы «Жұмысшы – мәртебелі мамандық» атты арнайы ақпараттық-насихат жобасы жүзеге асырылып, оқушылар мен ата-аналарға арналған кездесулер, кәсіби бағдар беру жәрмеңкелері, шеберлік сабақтары, ашық есік күндері өткізілді. Іс-шараларға 5 мыңнан астам жас қатысып, техникалық білімге қызығушылық білдірді.

ҮЗДІК МАМАНДАР – ҮЛГІ ТҰТАР ТҰЛҒАЛАР

Жыл аясында түрлі байқаулар мен марапаттау рәсімдері де ұйымдастырылды. Атап айтқанда, «Үздік дәнекерлеуші», «Жас электрмонтер», «Шебер аспаз» сынды кәсіби шеберлік конкурстары арқылы өз ісінің майталмандары анықталып, марапатқа ие болды. Жеңімпаздар республикалық деңгейдегі байқауларға жолдама алды.

ТҮЙІН

Жұмысшы мамандығы – кез келген қоғамның тірегі. Ұлытау облысында бұл бағыттағы жүйелі жұмыстар арқылы жастардың техникалық білімге деген қызығушылығы артып, қол еңбегінің беделі мен қадірі жаңаша бағалана бастады. Алдағы уақытта да бұл бағыттағы жұмыстар жалғасын тауып, еңбек адамына құрмет көрсету – өңір дамуының басты бағыты болмақ.

Ізтай БЕЛГІБАЙҰЛЫ.