Қауіпсіз қозғалыс — ортақ міндет
Қазіргі таңда көлік құралдары күнделікті өміріміздің ажырамас бөлігіне айналды. Алайда автокөлікті пайдалану барысында жол-көлік оқиғалары ғана емес, өрт шығу қаупі де бар екенін естен шығармаған жөн. Сондықтан әрбір жүргізуші мен жолаушының қауіпсіздік талаптарын сақтауы – адам өмірі мен денсаулығын қорғаудың маңызды кепілі.
Көлік құралдарында өрт көбіне электр сымдарының қысқа тұйықталуынан, жанар-жағармай жүйесіндегі ақаулардан, қозғалтқыштың шамадан тыс қызуынан немесе көлікті пайдалану талаптарының бұзылуынан туындайды. Осындай төтенше жағдайлардың алдын алу үшін автокөліктің техникалық жағдайын үнемі тексеріп, уақытылы техникалық қызмет көрсетіп отыру қажет.
Әрбір жүргізуші көлігінде жарамды өрт сөндіргіштің болуын қамтамасыз етуі тиіс. Сонымен қатар, өрт сөндіргішті қалай қолдану керектігін білгені дұрыс. Көлік салонында тез тұтанатын сұйықтықтарды сақтамау, электр жабдықтарын өз бетінше өзгертпеу және жанармай жүйесіндегі ақауларды дер кезінде жою да қауіпсіздіктің негізгі талаптарына жатады.
Егер көлік қозғалысы кезінде түтін, күйік иісі немесе жалын байқалса, жүргізуші көлікті қауіпсіз жерге тоқтатып, қозғалтқышты өшіріп, жолаушыларды дереу сыртқа шығаруы қажет. Адамдардың қауіпсіздігіне көз жеткізгеннен кейін ғана, өмірге қауіп төндірмейтін жағдайда, қолда бар өрт сөндіргішті пайдалануға болады. Қозғалтқыш бөлігіндегі өрт кезінде капотты толық ашуға болмайды, себебі жалын оттегі әсерінен күшеюі мүмкін. Өрт бақылаудан шықса, көліктен алыстап, қауіпсіз жерге бару және 112 нөміріне хабарлау қажет.
Сондай-ақ, көлікке жанармай құю кезінде қозғалтқышты өшіру, темекі шекпеу және ашық отты пайдаланбау талаптарын қатаң сақтау керек. Электр көліктерін зарядтау кезінде өндіруші ұсынған құрылғыларды пайдаланып, зақымдалған кабельдерді қолданбаған жөн.
Жолаушылардың да қауіпсіздікке қосар үлесі зор. Қауіпсіздік белдігін тағу, қоғамдық көлікте жүргізушінің нұсқауларын орындау, есіктер мен апаттық шығу жолдарын бөгемеу – әр азаматтың міндеті. Қоғамдық көлікте өрт немесе түтін байқалса, сабыр сақтап, жүргізушіге дереу хабарлап, қауіпсіз эвакуация тәртібін ұстану қажет.
Қорытындылай келе, көлік құралдарын пайдалану кезіндегі қауіпсіздік ережелерін сақтау – әрбір азаматтың өмірі мен мүлкін қорғауға бағытталған маңызды қадам. Өрттің алдын алу үшін сақтық шараларын күнделікті дағдыға айналдырып, көліктің техникалық жарамдылығына жауапкершілікпен қарауымыз керек.
Қауіпсіздікке немқұрайлы қарамаңыз! Сақтық – өмір кепілі, ал өрттің алдын алу әрқайсымыздан басталады.
Ұлытау ауданы ТЖБ.
