Қазақтың «Күй-Шәмілі» – Ұлытауда
Сәрсенбінің сәтінде Ұлытау ауданы орталығына Қазақстанның еңбек сіңірген қайраткері, күйші-композитор Шәміл Әбілтай келді. Дәулескер күйші аудандық мәдениет және тілдерді дамыту бөлімінің мәжіліс залында Ұлытау жұртымен кездесті.
Көпшілікке аса қонымды болған іс-шараға Ұлытау аудандық мәслихаттың төрағасы Ахат Құрмансейітов, аудандық мәдениет және тілдерді дамыту бөлімінің басшысы Нұрлан Қасымбеков, ауданның ардагерлер кеңесінің төрағасы Серік Ташенов пен ұлттық өнерге іңкәр қауым қатысты.
«Күй құдіреті – Шәміл Әбілтай шеберлігі» тақырыбында ұйымдастырылған кездесуде дәулескер күйші көрермен сауалына жауап бере отырып, Ұлытаудың танымдық-тарихи тағылымын тамсана әңгімеледі. Талғампаз тыңдарманын аңсай күткен күйші дидарласу барысында ой саларлықтай әңгімесін әсерлі өрбітіп, кімге де болсын көтеріңкі көңіл-күй сыйлады. Қазақ еліне сазгерлігімен, күй құдіретімен таныла білген айтулы күйші көрермен алдында «Ұлытау – Жошы хан», «Жер ұраны – Ұлытау» тақырыбындағы өз туындыларын орындап берді. Киелі өнерді жанына серік еткен Шәміл Бисенғалиұлының төл туындылары тартымдылығымен көрерменге рухани әсер сыйлады.
Үстел басында майталман күйші өзінің балалық, жастық шағынан әңгіме өрбітіп, күйші –композитор ретіндегі қалыптасу жолын да баяндап берді. Байыпты кездесуде аудандық мәслихаттың төрағасы Ахат Құрмансейітов дәулескер күйшіге ықылас танытып, шынайы пейілмен жылы лебізін білдірді. Бұдан кейін мәдениет үйінің әншілері әнмен, күйшілері күймен сусатты. Осындай жан жадыратар жарасымды жүздесу мен келісті кездесуден әсер алған ұлытаулықтар орындаушылық мүмкіндігі айрықша күйшіге құрмет көрсетіп, Жезқазған қаласына шығарып салды.
Қайрат ЖҰМАБАЙ.
