АБЗАЛ ЖАНДАРҒА ҚҰРМЕТ КӨРСЕТІЛДІ
Бүгін — Денсаулық сақтау саласы қызметкерлерінің кәсіби мерекесі. Айтулы күн қарсаңында облысымыздың медицинасына еңбек сіңіріп жүрген жандарға құрмет көрсетілді.
Салтанатты жиында өңір басшысы Берік Әбдіғалиұлы сала қызметкерлерін құттықтап, бірқатар азаматқа «Денсаулық сақтау ісінің үздігі» және «Денсаулық сақтау ісіне қосқан үлесі үшін» төсбелгілерімен, Ұлытау облысының және Денсаулық сақтау министрлігінің Құрмет грамоталарымен, облыс әкімінің және ҚР Денсаулық сақтау министрінің Алғыс хаттарымен, кәсіподақтардың марапаттарын табыс етті. Сондай-ақ облыс әкімі медицина саласы ардагерлерінің еңбегін ерекше атап өтіп, «Еңбек ардагері» медалімен марапаттады.
«Ең бастысы кадр мәселесін шешу бағытында облысқа келетін мамандарға көтерме қолдау қаражатының сомасын биыл 2023 жылғы 95 млн-нан 150 млн-ға дейін арттырдық. Оларға пәтер бөлу мәселелері де күн тәртібіне қойылған. Резиденттерді оқыту жалғасуда.
Сондай-ақ, өңірімізге аса қажет заманауи перинаталдық және онкологиялық орталықтардың құрылысын бастау жоабалары дайындалуда. Облыстың басты клиникасы көпбейінді ауруханаға күрделі жөндеу жасалып, жаңаша жарақтандырылатын болады» – деді өңір басшысы өз сөзінде.
Шара барысында Ұлытау облысы әкімінің дәстүрлі сыйлығы лауреаттарының есімдері аталды. Осы жылы қызметкерлерге 16 номинация берілді. Айта кетейік, Жыл дәрігері болып Жезқазған қаласы Облыстық көпсалалы ауруханасының эндокринолог-дәрігері, директордың емдеу ісі жөніндегі орынбасары Гүлжахан Жаркешева танылды. «Жылдың үздік дәрігері»номинациясының иегері 5 млн теңгеге, қалған 15 номинантқа 1 млн теңгеден сертификат табыс етілді.
