«Елбасының асқақ арманы» салтанатты іс-шарасы өтті

Теміртау қаласында Тұңғыш Президенттің тарихи-мәдени орталығында Тұңғыш Президент күні мен ел тәуелсіздігінің 30 жылдығына орай салтанатты іс-шара өтті. Оған Елбасының үзеңгілестері мен облыс өңірлерінен Тәуелсіздіктің құрдастары қатысты. Ұлытау ауданынан Тәуелсіздік құрдасы, әріптесіміз, «Ұлытау» газетінің жауапты хатшысы Альмира ОСПАН да мерейлі шараға қатысып қайтқан еді.

Салтанатты іс-шараны облыс әкімі Жеңіс Қасымбек құттықтау сөзімен ашып берді.

– Тәуелсіздіктің 30 жылдығын қорытындылай келе, біздің еліміз Тұңғыш Президенттің басшылығымен жаһандық тарих үшін осындай қысқа мерзім ішінде қандай экономикалық, саяси және мәдени серпіліс жасағанын айқын көреміз, – деп атап өтті Жеңіс Махмұдұлы. – Биыл Қарағанды облысы үшін де жемісті жыл болды. Әсіресе, ел тарихын ұлықтау жолында Ұлытаудағы Жошы хан кешенінің ашылуы мен Мемлекет басшысы Қасым-жомарт Тоқаевтың аймаққа сапарын ерекше атап өткім келеді»,- деді облыс басшысы құттықтау сөзінде.

Салтанатты шарада сөз алған Елбасының үзеңгілестері ұйымдастырушыларға алғысын білдірді. Өз кезегінде ардагерлер тұңғыш президенттің жастық шағы және Мемлекет басшысының Теміртауға сапарлары туралы естеліктерімен бөлісті.

Тұңғыш Президентке еліктей отырып, осы батыл мамандықты таңдаған металлургтер В.Лысак және А.Мустафиндер өз мамандықтарын айта отырып, барша қатысушыларды мерекемен құттықтады.

30 жыл ішінде дәрігерлердің, мұғалімдердің, музыканттардың, спортшылардың, жұмысшылардың, өнеркәсіпшілердің бүкіл буыны өсті.

Іс-шара барысында облыстық «Saryarqa» телеарнасының редакторы Жанбота Елубаев өз сөзінде:

– Егемендіктің жарқын көрінісі ретінде елімізде ой еркіндігі мен ашықтықтың аксиомасы салтанат құрды. Осы орайда ойыма ҚР Тұңғыш Президенті-Елбасы Нұрсұлтан Назарбаевтың қанатты сөзі оралып отыр.«Журналистер санаға сақ, халыққа жақ болсын» деп айтқан болатын.Ойға серпіліс беретін, санаға сәуле ұялататын осы тәмсіл талай тілшінің өмірлік темірқазығына айналды,- деді.

Ал, Баянбек Аспандияров — облыстық жұқпалы аурулар ауруханасының балалар бөлімшесінің меңгерушісі:

— Пандемия кезінде бірінші соққыны біз алдық. Тәуекелдерге бара отырып, біз алдымен онымен қалай күресуге болатының білмедік. Бірақ медицина қызметкерлерінің тығыз жұмысы мен жанқиярлық еңбегінің арқасында көптеген адамдардың өмірін сақтап қалды. Қиын кезеңде медицина қызметкерлері үшін және бүкіл ел үшін бізді барынша қолдағаны үшін мемлекетімізге алғыс айтқым келеді деді. жас дәрігер.

Облыс әкімімен кездесуге барған әріптесімізді біз де сөзге тартқан едік.

– Тәуелсіздік – бабалар аңсауы. Ұрпақтың қолы жеткен киелі кезең. Егемендіктің таңы атқан жылы, Тәуелсіздігіміздің түпқазығы қағылған қасиетті Ұлытауда дүниеге келдім. Ел Тәуелсіздігімен бірге дүниеге келу, елдің дамуымен бірге өсу – ерекше сезім, зор жауапкершілік. Азаттық – аманат! Аманат біздің қолда. Ендеше, біз, Қазақстан жастары ел ертеңі үшін биік болуға, бірге дамуға тиіспіз,- деді Альмира Мақсұтқызы.

Іс-шара барысында Елбасының сүйікті өлеңдері орындалып, жас теміртаулықтар биден шашу шашып, өздері қолдан жасаған сыйлықтарын ардагерлерге табыстады.

Өз тілшімізден.