109 шақырым жол жаңартылды
Ұлытау облысында республикалық маңызы бар «Жезқазған – Арқалық – Петропавл» автомобиль жолының 109 шақырымдық бөлігінде орташа жөндеу жұмыстары толық аяқталды. Жөндеуден өткен 143-252 шақырым аралығындағы учаске көлік қозғалысына ашылды. Бұл – өңірдің көлік инфрақұрылымын дамыту, ауданаралық және облысаралық қатынасты жақсарту бағытындағы маңызды жобалардың бірі.

Ұлытау облысы әкімдігінің ресми сайтының хабарлауынша, Жезқазған қаласынан Қостанай облысының шекарасына дейін созылатын республикалық маңызы бар автомобиль жолының жалпы ұзындығы 238 шақырымды құрайды. Аталған жобаның аясында Ұлытау елді мекенінен көршілес облыстың шекарасына дейінгі жол бөлігіне орташа жөндеу жүргізілді.
Жол жөндеу жұмыстарының сапалы әрі жүйелі орындалуы үшін жоба жеті учаскеге бөлініп, құрылыс-монтаж жұмыстары кезең-кезеңімен жүзеге асырылды. Жұмыс барысында жолдың төсемі жаңартылып, оның пайдалану жағдайын жақсартуға бағытталған бірқатар инженерлік шаралар атқарылды.
Атап айтқанда, жол бойындағы су өткізу жүйесін ретке келтіру мақсатында 17 су өткізу құбыры орнатылып, жаңартылды. Сонымен қатар, Балға көпірінде жөндеу жұмыстары жүргізілді. Бұл жұмыстар жолдың ұзақ мерзімді пайдаланылуын қамтамасыз етуге, табиғи факторлардың әсерін азайтуға және көлік қозғалысының қауіпсіздігін арттыруға бағытталған.
Айта кетейік, нысандағы жұмыстар бұған дейін де кезең-кезеңімен пайдалануға беріліп келген. Мәселен, 2025 жылдың қараша айында жолдың 193-208 шақырым аралығындағы 15 шақырымдық бөлігі көлік қозғалысына ашылған болатын. Ал қазіргі уақытта қалған учаскелердегі жөндеу жұмыстары да толық аяқталып, нәтижесінде 109 шақырым жол жаңартылып, пайдалануға берілді.
Жол құрылысы мен жөндеу жұмыстары барысында сапа мәселесі де басты назарда болды. Атқарылған жұмыстардың белгіленген талаптарға сәйкестігін тексеру үшін Ұлттық сапа орталығының мамандары құрылыс материалдарынан сынамалар алып, зертханалық зерттеулер жүргізді. Бұл – жол төсемінің сапасын, қолданылған материалдардың нормативтік талаптарға сәйкестігін бағалауға мүмкіндік беретін маңызды бақылау тетігі.
Сонымен қатар, мердігер ұйымдар атқарылған жұмыстарға қатысты үш жылға дейінгі мерзімге кепілдік міндеттемелерін қарастырған. Бұл өз кезегінде жөнделген жолдың сапасына жауапкершілікті арттырып, пайдалануға беру кезеңінен кейін де оның жағдайын бақылауға мүмкіндік береді.
Жалпы, «Жезқазған – Арқалық – Петропавл» автомобиль жолы – Ұлытау өңірін өзге облыстармен байланыстыратын маңызды көлік бағыттарының бірі. Оның сапалы болуы тұрғындардың қатынауына, жүк тасымалының үздіксіз жүруіне, ауыл шаруашылығы және өзге де экономикалық салалардың дамуына тікелей ықпал етеді.
Әсіресе, шалғай елді мекендер арасындағы жол қатынасының жақсаруы ауыл тұрғындары үшін айрықша маңызды. Сапалы жол – уақыт үнемдеу, көлік шығынын азайту, жол-көлік оқиғаларының алдын алу және тұрғындардың қауіпсіз қозғалысын қамтамасыз етудің негізгі шарттарының бірі.
Осылайша, 109 шақырым жолдың жөнделіп, толықтай көлік қозғалысына ашылуы Ұлытау облысының көлік инфрақұрылымын жаңғыртудағы кезекті маңызды қадам болды. Жоба өңірдің көлік әлеуетін арттырып қана қоймай, облысаралық байланысты нығайтуға және тұрғындар үшін қолайлы қатынас жағдайын қалыптастыруға үлес қосады.
Досан ДУЛЫҒАЛЫ.
