Денсаулық саласына тың серпін күтілуде

«Бірінші байлық – денсаулық» дейді халқымыз. Расында да, өмірдің мәні де, сәні де – адамның амандығы мен елдің саулығы. Сондықтан да Мемлекет басшысы әрдайым денсаулық сақтау саласын жетілдіруді мемлекеттің басты міндеттерінің бірі ретінде атап көрсетіп келеді. Осы орайда жуырда Ұлытау облысына жұмыс сапарымен келген ҚР Денсаулық сақтау министрі Ақмарал Әлназарованың сапары өңір жұртшылығы үшін үлкен үміт отын жаққандай болды.

Министр алдымен Жезқазған мен Сәтбаев қалаларындағы бірқатар аурухана мен емханаларды аралады. Заманауи техникасы бар, жағдайы түзеліп келе жатқан нысандар да бар, бірақ кейбір мекемелерде әлі де шешімін күткен мәселелер жетерлік. Мұны министрдің өзі де атап өтіп, ең бастысы – халыққа көрсетілетін қызмет сапасын арттыру екенін жеткізді.
Сапардың ең жарқын сәттерінің бірі – әлемге белгілі кардиохирург Юрий Пямен кездесу болды. Ол жақында Жезқазғанда ашық жүрекке күрделі ота жасап, бірнеше науқастың өміріне араша түскен еді. Бұл – өңір медицинасы үшін бұрын-соңды болмаған оқиға. Министр мұны «Ұлытау өңіріндегі денсаулық сақтау саласының үлкен жетістігі» деп бағалады. Енді жергілікті жұртшылықтың да астанадағы немесе шетелдегі емханаларға сабылмай-ақ, өз өңірінде күрделі ота жасатуға мүмкіндігі туып отыр.
Дегенмен, бір ғана техника немесе жаңа ғимаратпен денсаулық сақтау ісі алға баспайды. Ақмарал Әлназарова атап өткендей, ең бастысы – білікті кадр. Әсіресе онкологтар мен жоғары санатты мамандар жетіспейді. Осы мәселе шешілмейінше, халыққа сапалы қызмет көрсету қиын. Сондықтан министр жергілікті билікке кадр тарту ісін күшейту қажеттігін тапсырды.
Сапар аясында облыс әкімдігі, Денсаулық сақтау министрлігі және «Қазақмыс» корпорациясы арасында маңызды үшжақты меморандумға қол қойылды. Бұл құжат 2026–2029 жылдарға арналған өңірлік денсаулық сақтау бағдарламасын қамтиды. Жоспарда жаңа технология енгізу, медициналық мекемелерді цифрландыру, білікті кадр тарту, заманауи құрал-жабдықпен қамтамасыз ету сынды міндеттер тұр.
Бұл келісім – тек ресми рәсім емес, Ұлытау халқының денсаулығын жақсартуға арналған нақты қадам.
Сапар соңында министр қарапайым тұрғындармен кездесіп, олардың жеке сұрақтарын тыңдады. Көпшілік өз мұң-мұқтажын ашық айтып, жауапты сала басшысынан нақты жауап алды. Сондай-ақ БАҚ өкілдерімен өткен брифингте өңірдің денсаулық саласын дамытуға бағытталған жұмыстар егжей-тегжейлі түсіндірілді.
Ұлытау – өндірістің ортасы, еңбекпен шыныққан өңір. Мұнда халықтың денсаулығы – елдің еңсесімен тең. «Дені сау адам – қоғамның ең үлкен байлығы» десек, министрдің бұл сапары – сол байлықты еселеуге бағытталған ізгі бастама.
Алдағы жылдары жаңа бағдарламалар іске асса, дәрігер тапшылығы жойылып, заманауи емдеу әдістері қолжетімді бола түссе, Ұлытау жұртының көңілі жайланып, дені сау ұрпақтың қатары көбейері сөзсіз.

Ізтай БЕЛГІБАЙҰЛЫ.