Абайға арналған тағылымды-танымдық кеш

Абай Құнанбайұлының 180 жылдық мерейтойына орай Ұлытау аудандық тарихи-өлкетану музейінде рухани мәні зор танымдық кеш ұйымдастырылды. Бұл шара «Адамзаттың бәрін сүй, бауырым деп» ұлы ұстанымды өмірлік қағида еткен дана Абайдың өнегелі өмірі мен өлмес мұрасын өскелең ұрпаққа насихаттау мақсатында «Абай – ұлттың ұлы ұстазы» деген атаумен өтті.

Іс-шара аясында музей қонақтарына арнайы экскурсия ұйымдастырылып, тақырыптық залдардағы тарихи жәдігерлер таныстырылды. Бұл шараға Жезқазған қаласының және Ұлытау ауданының Құрметті азаматы Сағындық Қожамсейітов, Қазақстан Республикасының білім беру ісінің Құрметті қызметкері Ғазиз Ештанаев пен Қарағанды облысы мен Жезқазған қаласының Құрметті азаматы Төлеген Бүкіров бастаған Ұлытау облыстық «Абай керуені» әдеби сапарының мүшелері арнайы келіп, жастарға жүрекжарды тілектерін арнап, ұлы ойшылдың ғибратты сөздерімен ой бөлісті. Кештің мазмұнын байытқан маңызды сәттердің бірі – Абайдың 95 жылдық мерейтойына орай, 1940 жылы құрылған «Жидебай–Бөрілі» мемлекеттік тарихи-мәдени және әдеби мемориалдық музей-қорығымен тікелей байланыс орнатылған онлайн форматындағы экскурсия болды. Zoom платформасы арқылы өткен бұл шарада музейдің экскурсиялық ғылыми-көпшілік жұмыстар бөлімінің меңгерушісі Нұржан Ерланұлы қатысушыларды Абай мекенімен таныстырып, ақын өміріне қатысты тың деректерді ұсынды.

Онлайн экскурсиясы барысында Абай өмір сүрген Жидебай мекені мен ондағы құнды жәдігерлер “Жыл мезгілдері”, “Ақынның қалыптасуы” сынды тақырыптық залдар, ақынның жеке заттары мен сирек кездесетін мұралар туралы мағлұматтар берілді. Шара аясында Абай шығармашылығына арналған интеллектуалды викториналық ойындар өткізілді. Қатысушылар Абайдың өмірі мен өлеңдерінен қойылған сұрақтарға жауап бере отырып, ұлы тұлғаның даналық әлеміне терең бойлады. Кештің рухани шарықтау сәтінде Абай әндері шырқалып, қатысушылар ерекше әсерге бөленді. Шара соңында музей басшысының уақытша міндетін атқарушы Батырлан Төлеуұлы қорытынды сөз сөйлеп, жастарға Абайдың “Қарасөздері” кітабын сыйға тартты.
Қорыта айтқанда, Абай – өткеннің ғана емес, болашақтың да шамшырағы. Оның әрбір ойы – саналы ұрпаққа сарқылмас рухани қазына. Ұлы ойшылдың 180 жылдық мерейтойына арналған бұл танымдық кеш – ұлт руханиятын ұлықтаған, мәңгілік мұраға тағзым еткен тағылымды іс-шара болғаны анық.

Айжан ЕРЛАНҚЫЗЫ,
Ұлытау аудандық
тарихи-өлкетану
музейінің қызметкері.