Ұлттық ауыл шаруашылығы санағы басталды

Қазақстанда он жылда бір рет жүргізілетін маңызды мемлекеттік шара – Ұлттық ауыл шаруашылығы санағы биылғы жылы жаңа форматта жүзеге асырылуда. Бұл науқан еліміздің барлық өңірлерін қамтитыны белгілі. Соның ішінде Ұлытау ауданында да бұл бағыттағы жұмыстар жүйелі түрде басталып кетті.

Санақтың басты мақсаты – ауыл шаруашылығы саласындағы нақты жағдайды, өндіріс көлемін, үй шаруашылықтарының әлеуетін, фермерлік құрылымдар мен заңды тұлғалардың аграрлық қызметін жан-жақты зерделеу. Алынған мәліметтер мемлекеттік бағдарламаларды жоспарлау мен жүзеге асыруда, ауылдық аумақтардың әлеуметтік-экономикалық дамуын бағалауда үлкен маңызға ие.
2025 жылдың 1–31 тамызы аралығында sanaq.gov.kz веб-платформасы арқылы онлайн сауалнама жүргізілуде. Бұл – санақтың алғашқы кезеңі. Аудандағы барлық ауылдық округтерде арнайы санақ пункттері дайындалып, фермерлер мен шаруа қожалықтарының, сондай-ақ заңды тұлғалардың сауалнамаға қатысуына толық мүмкіндік жасалды.
Ауыл тұрғындары үшін онлайн тіркелудің тиімділігі – уақытты үнемдеп, жеке мәліметтерді өз бетінше толтыру мүмкіндігіне ие болуында. Бұл үдеріс еліміздегі цифрлық даму бағытындағы тың серпіннің бір көрінісі деуге болады.
Онлайн сауалнамаға қатыса алмаған азаматтар үшін офлайн кезең қарастырылған. 2025 жылдың 20 қыркүйегі мен 20 қазаны аралығында арнайы оқытылған интервьюерлер (санақшылар) әрбір үй шаруашылығын аралап шығады. Олар барлық қажетті ақпаратты сауалнама түрінде жинақтап, орталық базаға жолдайды.
Ұлытау ауданы бойынша бұл іске жауапты мекемелер мен мамандар дайындық жұмыстарын пысықтап, санақтың әділ әрі сапалы өтуіне бар күшін жұмылдыруда. Әрбір тұрғынның белсенді қатысуы – еліміздің аграрлық болашағын айқындауға қосқан сүбелі үлесі екенін түсіну маңызды.
Жиналған деректер еліміздің ауыл шаруашылығы саясатының басым бағыттарын айқындауға негіз болады. Қай өңірде қандай дақыл тиімді, қай округте мал шаруашылығы өркендеп келеді, қай ауылда инфрақұрылым жеткіліксіз – міне, осының барлығына нақты жауап осы санақ нәтижесінде алынады.
Ұлттық ауыл шаруашылығы санағы – ел экономикасының басты салаларының бірі – ауыл шаруашылығының шынайы бейнесін көрсетуге бағытталған маңызды шара. Ұлытау ауданы бұл үдерісте де белсенділік танытып келеді. Әрбір ауыл тұрғынының сауалнамаға қатысуы – ауданымыздың әлеуетін көрсететін нақты көрсеткіш. Сондықтан, аудан халқын осы науқанға бейжай қарамай, дер кезінде қатысуға шақырамыз.

Ізтай БЕЛГІБАЙҰЛЫ.