Ұлытау облысында «Тасбұлақ» бұлағы ресми түрде пайдалануға берілді
«AMANAT» партиясының сайлауалды бағдарламасы аясында Ұлытау облысы Ұлытау ауданында «Тасбұлақ» бұлағының аумағы абаттандырылып, ресми түрде пайдалануға берілді. Жоба Мемлекет басшысының тапсырмасына сәйкес туристік инфрақұрылымды дамыту мақсатында «Қазақмыс» корпорациясының қолдауымен жүзеге асып отыр.
Ашылу салтанатына Ұлытау облысы әкімінің орынбасары Жәнібек Нөпіров қатысып, нысанның ашылуымен құттықтады.
«Қарт Ұлытаудың қойнауындағы таза бұлақтың маңы жаңартылып, бүгін халықтың пайдалануына беріліп отыр. Қасиетті Ұлытау өңіріне келген барша қонақ, туристер бұл бұлақтың суынан ішпей кетпейді», – деді ол.
Аумағы – 600 шаршы метрден асатын орынға жасыл желектер, ағаштар отырғызылып, толық абаттандырылған. Сондай-ақ Ұлытаудың тарихын айқындайтын белгі – тас орнатылған.
«Ауылымыздағы бұлақ – тек тіршілік көзі ғана емес, рухани тынысымыз, шипалы мекеніміз. Күмістей мөлдір суы жанға шипа, дертке дауа. Келген қонаққа бірінші көрсететініміз де осы – табиғат тартуы. Бұлақтың көзін ашу, маңайын абаттандыру – ұрпаққа аманат. Бұл – болашаққа жасаған ізгі іс, туған жерге деген құрметтің жарқын көрінісі», – деді еңбек ардагері Мақсұт Оспанов.
