Ұлы Жеңістің 80 жылдығы – ерлік пен мәңгілік даңқтың мерекесі
Биыл біз адамзат тарихындағы ең ұлы әрі ең қайғылы оқиғалардың бірі – Екінші дүниежүзілік соғыстың аяқталғанына 80 жыл толуын атап өтудеміз. Бұл — миллиондаған адамның жанқиярлықпен күресіп, өмірін құрбан еткен Ұлы Жеңісінің мерейтойы. Әрбір отбасының тарихында із қалдырған осы соғыс халқымыздың қайсар рухының, бірлігінің және Отанға деген шексіз сүйіспеншілігінің белгісі болып қалды.
Ұлы Жеңіс — ерлік пен батырлықтың мәңгілік ескерткіші. Біздің аталарымыз бен әжелеріміз майданда да, тылда да жан аямай еңбек етті. Олар өз өмірлерін қатерге тіге отырып, келешек ұрпақтың бейбіт өмірі үшін күресті. Сол күндері көрсетілген ерліктер мен адамгершілік қасиеттер бізге бүгінгі бейбіт заманның бағасын терең түсінуге мүмкіндік береді.
Бүгін біз Жеңіс туын желбіреткен батырларды ерекше ілтипатпен еске аламыз. Олардың ерлігі ұрпақтан-ұрпаққа өтіп, мәңгілік ұлықталуы тиіс. Жастарымыз тарихты ұмытпай, ерлікті құрметтеп, елдің тыныштығы мен тұрақтылығын сақтау үшін жауапкершілікпен қарауы қажет.
Ұлы Жеңістің 80 жылдығы — бұл тек өткенді еске алу ғана емес, болашаққа бағытталған үлкен тағылым. Бейбіт күннің қадірін біліп, тарих сабақтарынан өнеге ала білу – біздің қасиетті борышымыз. Аталар аманатын ақтап, елдігімізді нығайту жолында еңбек ете беру — бүгінгі ұрпақтың басты парызы.
Мәңгілік тағзым саған, Жеңіс күні!
Мәңгілік тағзым саған, ерлік пен өрлік рухы!
Ғазиз УСКЕНБАЕВ,
зейнеткер.
