Мектептегі тарихи сәттер

Ұлытау ауданы Байқоңыр ауылындағы №17 жалпы білім беретін мектеп үшін биылғы оқу жылы ерекше мазмұнмен және айрықша тарихи оқиғалармен қорытындыланды. Білім ордасында ұйымдастырылған тағылымды кеш тек оқу жылының аяқталуын ғана емес, сонымен қатар, мектептің материалдық-техникалық базасының жаңа деңгейге көтерілуін айғақтады. Бұл – білім сапасын арттыруға бағытталған жүйелі жұмыстың нақты нәтижесі ретінде бағалануда.

Мектеп қабырғасында өткен салтанатты жиын аясында жаңа үлгідегі оқу кабинеттерінің ашылуы ұйымдастырылды. Атап айтқанда, «Қазақ ССР ағарту ісінің озық қызметкері» Абилов Жұмабайдың есімі берілген математика кабинеті және «Қазақстанның еңбек сіңірген ұстазы» Байулова Гүлназия Сабырқызы атындағы тарих-география кабинеттері ресми түрде пайдалануға берілді.
Бұл бастама – ұстаздар еңбегіне көрсетілген құрмет қана емес, сонымен қатар, жас ұрпақтың сапалы білім алуына жасалған нақты инвестиция. Кабинеттер заманауи талаптарға сай толық жабдықталып, жаңа үлгідегі парталармен, интерактивті панельдермен, заманауи шкафтармен қамтамасыз етілді. Мұндай оқу ортасы оқушылардың пәнге деген қызығушылығын арттырып, білім беру процесін жаңа деңгейге көтеретіні сөзсіз.
Жаңа кабинеттердің ашылуына ардақты ұстаздардың шәкірттері мен ұрпақтары демеушілік көрсетіп, мектепке зор қолдау білдірді. Бұл – тек материалдық көмек емес, ұстаз есімін ұлықтау арқылы ұрпақтар арасындағы рухани байланыстың үзілмегенінің айқын көрінісі.
Білім ордасында өткен кештің басты идеясы да – ұстазға деген құрмет пен білімге деген жауапкершілікті дәріптеу болды. Мұндай игі бастамалар мектептің рухани-мәдени ортасын нығайтып, оның қоғамдағы беделін арттыра түседі.
Кеш барысында мектеп түлектері де өздерінің мерейтойлық кездесулеріне орай туған білім ордасына ерекше тартуларын табыстады. Бұл дәстүр – түлектер мен мектеп арасындағы байланыстың берік екенін көрсететін маңызды әлеуметтік құбылысқа айналып отыр. 50 жылдық түлектер мектепке құны 1 400 000 теңге тұратын интерактивті панель сыйласа, 45 жылдық түлектер мектеп ауласының жарықтандыруын жақсарту мақсатында 400 000 теңгеге жарық шамдарын орнатуға қолдау көрсетті. Ал, 40 жылдық түлектер мектептегі іс-шараларды түсіруге арналған 300 000 теңгелік дрон тарту етті. 20 жылдық түлектер мектеп қажеттіліктеріне жұмсау үшін 300 000 теңге көлемінде қаржылай көмек көрсетті. Бұл игі істер – туған мектепке деген шынайы құрметтің, азаматтық жауапкершіліктің және әлеуметтік бірліктің жарқын көрінісі.
Жаңадан жабдықталған кабинеттер мен демеушілердің қолдауы №17 мектептің оқу-материалдық базасын айтарлықтай жаңартты. Интерактивті технологиялардың енгізілуі сабақ процесін түрлендіріп, оқушылардың сыни ойлау, зерттеу және цифрлық дағдыларын дамытуға мүмкіндік береді. Мұндай өзгерістер ауыл мектебінің де заманауи білім беру талаптарына толық сай бола алатынын көрсетіп отыр. Ең бастысы – бұл бастамалар оқушылардың сапалы білім алып, бәсекеге қабілетті тұлға болып қалыптасуына жол ашады.
Байқоңыр ауылындағы №17 мектепте биылғы оқу жылы тек қорытындыланып қана қойған жоқ, сонымен қатар, жаңа тарихи кезеңнің басталуымен есте қалды. Жаңа кабинеттердің ашылуы, түлектердің қолдауы және ұстаздар есімін ұлықтау – бәрі бірігіп, білім ордасының рухани әрі материалдық дамуына серпін берді. Бұл – мектеп пен қоғам арасындағы байланыстың нығаюының, ұрпақтар сабақтастығының және білімге деген ортақ құрметтің айқын дәлелі.

Досан ДУЛЫҒАЛЫ.