Жұмысшы мамандығының мәртебесін көтеру – ел болашағының негізі

Жұмысшы мамандықтар жылы – қоғам үшін өте маңызды бастама.
Өйткені кез келген мемлекеттің дамуы қарапайым еңбек адамынан басталады. Құрылысшы салмаса – жаңа үйлер бой көтермейді, жүргізуші болмаса – халық қалаған жеріне жете алмайды, дәнекерлеуші мен ағаш шебері болмаса – өндіріс тоқтап қалады. Біз күнделікті өмірде осы мамандық иелерінің еңбегін көріп жүрсек те, көбіне бағалай бермейміз.

Бұл жыл – еңбек адамының мәртебесін көтеруге, жастарға жұмысшы мамандықтарының қадірін түсіндіруге бағытталған. Жұмысшы – тек қол күші емес, ол – қоғамға қызмет ететін нағыз шебер, ел экономикасының тірегі. Жастарды кәсіби-техникалық білімге тарту арқылы біз болашақта өз ісінің майталмандарын қалыптастырамыз.

Жұмысшы мамандығын таңдау – үлкен жауапкершілік әрі мақтаныш. Себебі әрбір істің артында адамның маңдай тері, еңбегі жатыр. Сондықтан «Жұмысшы мамандықтар жылы» – еңбекке құрмет көрсету, қарапайым адамдардың еңбегін бағалау, қоғамды адал еңбекке тәрбиелеудің тамаша мүмкіндігі.

Айтжан НАЗАР,
белсенді жас.