Құрметті құрылыс саласының ардагерлері мен қызметкерлері!

Сіздерді кәсіби мерекелеріңіз – Құрылысшылар күнімен шын жүректен құттықтаймын!

Бұл мереке – сәулетші, құрылысшы, инженер, жобалаушы сынды мыңдаған маманның еңбегін ұлықтайтын, ел игілігі үшін аянбай тер төгіп жүрген азаматтардың бірлігін көрсететін айрықша күн. Құрылыс саласы – мемлекеттің даму қарқынын айқындайтын, халықтың тұрмыс сапасын арттыратын маңызды сала. Сіздердің тынымсыз еңбектеріңіздің, біліктілік пен іскерліктің арқасында елімізде сәулеті келіскен ғимараттар мен өмір сүруге жайлы орталар бой көтеріп келеді.

Ұлытау облысында құрылыс саласының серпіні жыл сайын артып, халықтың тұрғын үйге деген сұранысы кезең-кезеңімен қамтамасыз етілуде. Облыс құрылғанға дейін пайдалануға берілген тұрғын үй көлемі 63 мың шаршы метр болса, былтыр 108 мың шаршы метрге жетті. Жалпы құрылған кезеңнен бастап 3 жыл аралығында 300 мың шаршы метр (биылғы жылғы 7 айлық көрсеткішті қоса алғанда) тұрғын үй пайдалануға берілді. Биыл 111 мың шаршы метр тапсыру жоспарда. Әлеуметтік осал топтарды қолдау мақсатында республикалық бюджеттен қаражат бөлініп, қолжетімді тұрғын үй құрылысы қарқын алуда.

Сондай-ақ, өңірімізде тұрғын үй құрылысынан басқа салалардағы нысандардың бой көтеруінде айтарлықтай оң өзгерістер байқалып келеді. Мәселен, 2021 жылы, яғни, облыс құрылғанға дейін құрылыс-монтаждау жұмыстарының көлемі 93,9 млрд.теңге құраса, облыс құрылғаннан бергі 3 жылда жалпы 360 млрд.теңгеге орындалды, яғни орта есеппен бір жылдық көрсеткіш 120 млрд.теңге. Осы жылы көлемі 148 млрд.теңгені құрайтын құрылыс-монтаждау жұмыстарын орындау жоспарда.

Өздеріңіз білетіндей, Теректідегі мектеп, Жезқазған, Сәтбаев қалаларындағы балабақшалар, Оқушылар сарайы сынды өңірде он жылдан астам құрылысы тоқтап тұрған проблемалы нысандар облысымыз құрылғаннан кейін аяқталу мүмкіндігіне ие болды. Сондай-ақ, Халықтар достығы мен мәдениеті үйі, Шынболат Ділдебаев атындағы кеншілер сарайы жаңғыртудан өтуде. Осындай ауқымды жұмыстарда сіздердің ерен еңбектеріңіз жатыр.

Облыс орталығы – Жезқазған қаласының келбетін айшықтайтын әлеуметтік нысандар да назардан тыс қалмауда. Қазіргі таңда заманауи Конгресс-холл мен Мұз аренасы бар спорт сарайын және емхана салу жоспарланып отыр. Сонымен қатар, сыйымдылығы 3000 адамды құрайтын жаңа мешіттің құрылысы да басталды. 25 тамызда оқушылар сарайының алғашқы ірге тасын қалау жұмысын бастағалы отырмыз. Бұл нысандардың әр кірпіші – Сіздердің маңдай терлеріңіз бен адал еңбектеріңіздің айғағы.

Құрылыс – тек қабырғасы қаланған ғимарат қана емес, ол – болашаққа қалатын ізі бар ізгі еңбек. Сіздерге көрсетілер құрмет те, айтылар алғыс та шексіз!
Мереке құтты болсын!

Дастан РЫСПЕКОВ,
Ұлытау облысының әкімі.