6 қазанда АЭС салу мәселесіне қатысты жалпыұлттық референдум өтеді – Президент
Президент «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында атом энергетикасын дамытуға баса мән беруіміз керек екенін айтты.
Мемлекет басшысының айтуынша, елімізге сенімді және экологиялық таза қуат көздерін тарту аса маңызды. Сондықтан, атом энергетикасын дамыту мәселесіне бас мән беруіміз қажет.
«Қазір әлемде энергия тапшылығы күшейіп барады. Елімізге сенімді және экологиялық таза қуат көздері аса қажет. Сондықтан біз атом энергетикасын дамытуға баса мән беруіміз керек деп ойлаймын. Себебі экономикамыз күн өткен сайын мол энергияны қажет етуде. Мұндай сұранысты атом энергетикасы қамтамасыз ете алады. Қазір дамыған және дамушы 30 мемлекетте 200-ге жуық атом электр стансасы жұмыс істеп тұр».
Жолдауда Президент атом электр стансасын салуға қатысты барынша байыпты шешім қабылдау қажеттігін, сондай-ақ стратегиялық жоспарларды қоғамда кеңінен талқылау керек екенін атап өтті.
«Ел өміріндегі әрбір маңызды қадам жұртшылықпен бірлесіп жасалуға тиіс. Атом электр стансасы туралы референдумға қатысты да дәл солай болуы керек. Былтыр мен бұл мәселе бойынша өз пікірімді айттым, яғни, референдум тақырыбының қоғам талқысына түскеніне бір жыл болды. Бұл азаматтарымыздың жан-жақты ойланып, салмақты шешім қабылдауына жеткілікті мерзім деп ойлаймын. Сондықтан мен Үкіметтің ұсынысын қолдаймын», деді Мемлекет басшысы.
Сонымен қатар, биыл 6 қазанда Атом электр стансасын салу мәселесіне қатысты жалпыұлттық референдум өтеді. Бүгін, Президент Қасым-Жомарт Тоқаев тиісті Жарлыққа қол қояды.
«Атом электр стансасын салу мәселесіне қатысты жалпыұлттық референдум биылғы 6 қазанда өтеді. Бүгін тиісті Жарлыққа қол қоямын. Алдағы референдум кең ауқымды жалпыұлттық диалогтың тағы бір айқын көрінісі болмақ. Шын мәнінде, бұл – «Халық үніне құлақ асатын мемлекетке» тән сипат. Біз осындай қадамдар арқылы жаңа қоғамдық-саяси мәдениеттің негізін қалаймыз. Маңызды мемлекеттік шешімдер қабылдаудың жаңа үлгісін жасаймыз», – деді Мемлекет басшысы.
