Жезқазғанда Халыққа қызмет көрсету орталығының жаңа ғимараты ашылады
Жезқазғанда азаматтарға ыңғайлы болу үшін тағы бір халыққа қызмет көрсету орталығы ашылады. Жаңа ХҚКО ашылу қарсаңында ғимаратқа облыс әкімі Берік Әбдіғалиұлы барды.
«Азаматтарға арналған үкімет» мемлекеттік корпорациясы» КЕАҚ Ұлытау облысы бойынша филиалы директорының орынбасары Ж.Құлжанбековтың айтуынша, мұнда мемлекеттік қызметтердің барлық түрлері, соның ішінде цифрлық түрлері көрсетілетін болады. Ғимаратта құрылыс және жөндеу жұмыстары аяқталды, алдағы күндері кеңсе жабдықтары қосылады.
Өңір басшысы ғимаратты аралап, атқарылған жұмыстарға оң баға берді.
Халыққа қызмет көрсету орталығының ашылуы 28 желтоқсанға жоспарланған.
Жаңа ХҚКО Жезқазған қаласы, Абай көшесі, 9А мекенжайында орналасқан. Бұл ретте Момышұлы көшесінде орналасқан бұрынғы Халыққа қызмет көрсету орталығы өз жұмысын тоқтатпайтынын атап өтеміз.
