«Бір ауыл – бір өнім» байқауы – жаңа мүмкіндіктер бастауы

Бейсенбі күні облыс орталығында Ұлытау облысы кәсіпкерлер палатасының ұйымдастыруымен «Бір ауыл – бір өнім» байқауы аясында бренд-комитетінің отырысы өтті.

Бұл іс – шара облыс әкімінің орынбасары Жәнібек Нөпіровтің қатысуымен өткізілді. Оған Жезқазған, Сәтбаев қалаларынан, сондай-ақ, Жаңаарқа және Ұлытау аудандарынан ауылшаруашылық өнімдерін өндірушілер қатысты. Көрмеге қатысушылар ет пен сүттен дайындалған экологиялық таза өнімдерін, табиғи жүн мен киізден жасалған тауарларын, сонымен қатар, былғарыдан жасалған қолөнер туындыларын, қой жүнінен әзірлеген суреттерді, көне тәсілімен өрілген қамшыларды көпшілікке таныстырды. Бұл жолғы көрменің басты ерекшелігі – Жаңаарқа ауданының өндірушісі ұсынған қымыздан жасалған балмұздақ болды. Байқауда бренд-комитеті көрмеге ұсынылған өнімдердің табиғи құрамын, қаптаманың герметикалығы мен брендтелу деңгейін, дизайнының тартымдылығын, сондай-ақ, санитарлық талаптарға сәйкестігін бірнеше өлшем бойынша сараптап бағалады. Қорытындысында жүзден жүйрік шыққандары анықталып, жеңімпаздарға сертификаттар табысталды. Басқа да қатысушыларға ұйымдастырушы тараптың атынан Алғыс хаттар берілді.
Шара барысында Ұлытау облысы кәсіпкерлер палатасының директоры Гүлмира Қаженова бұл іс-шара жергілікті ауыл шаруашылығы тауарын өндірушілерді қолдаудың, сонымен қатар, аграрлық сектордың дамуына оң әсер ететін және кәсіпкерлердің өз ісін дамытуына мүмкіндік беретін ауқымды жоба екенін айтып өтті. «Ауыл шаруашылығы өнімдерінің артықшылығы – табиғи құрам, бояғыштар мен консерванттардың болмауы, ең бастысы, халыққа пайдасы бар өнім болуында» – деді облыстық кәсіпкерлер палатасының директоры. Бренд-комитеті отырысында көрмеге қатысушылардың үздіктері анықталды. Ет өндеуден – Мадина Даркенова (Сәтбаев қаласы), қымыз және қымыздан жасалған балмұздақ бойынша Айтбай Қасымов (Жаңаарқа ауданы), былғары өңдеу, қамшы жасаудан – Ертай Қалдыбаев (Жаңаарқа ауданы) – үздік деп танылды.
Енді алдағы күндері есімдері жоғарғыда аталған үздіктер Ұлытау облысы атынан Астана төрінде өз өнімдерін таныстыра алады. Бұл бастама олардың өнімдерін нарыққа шығаруына мол мүмкіндік болып тұр. Сонымен қатар, 5 миллион теңге көлеміндегі грантқа үміткер атанады. Осы бастама тек бизнестің дамуына жол ашып қана қоймай, сонымен қатар, дәстүр мен табиғилыққа негізделген жергілікті ауылшаруашылығы өнімдерінің беделін арттыруға ықпал ететін тиімді жоба болды.

Өз тілшімізден.