Ауылдың болашағы – әрбір азаматтың жауапкершілігінде

2025 жылы елімізде ауыл шаруашылығы саласына қатысты маңызды оқиға — Ұлттық ауыл шаруашылығы санағы өтеді. Бұл — Қазақстанда осымен екінші рет ұйымдастырылып отырған кең ауқымды статистикалық іс-шара. Санақтың басты мақсаты — ауыл шаруашылығы саласының нақты жағдайын анықтап, сала бойынша мемлекеттік саясатты дұрыс жоспарлауға негіз бола алатын сенімді ақпарат жинау.

Санақ екі кезеңмен жүзеге асырылады. Бірінші кезең — 2025 жылдың 1 тамызынан 31 тамызына дейін бұл кезде респонденттер sanaq.gov.kz порталы арқылы онлайн түрде санақтан өте алады. Онлайн қатысу үшін тек компьютер немесе ноутбук пен ЭЦҚ (электрондық цифрлық қолтаңба) қажет. Смартфон арқылы толтыру қарастырылмаған.
Екінші кезеңде 20 қыркүйек пен 20 қазан аралығында — арнайы дайындалған санақшылар жеке-жеке тұрғын үйлерге барып, сауалнама жүргізеді. Бұл ауқымды науқанға Ұлытау ауданы тыңғылықты дайындалып отыр. Бүгінде аудан бойынша шамамен 1366 шаруа және фермер қожалығы, дара кәсіпкерлер бар. 16 ауыл шаруашылығымен айналысатын заңды тұлғалар, сонымен қатар, 2670 жеке үй шаруашылығы санаққа қатысады деп жоспарлануда.
Бүгінгі күні ауданның 15 ауылдық округінің әкімдіктерінде өзін-өзі қызмет көрсету бұрыштары жабдықталды. Онда интернетке қосылған компьютерлер қойылып, арнайы оқытылған мамандар тұрғындарға санақтан өтуге көмек көрсетеді. Үйінде техникалық мүмкіндігі жоқ азаматтар өз округіндегі әкімдікке келіп, сол жерде санақты толтыра алады.
Тұрғындарды хабардар ету мақсатында ауданда бірқатар ақпараттандыру жұмыстары жүргізілді. Барлық ауылдық округтерде ақпараттық баннерлер мен парақшалар таратылды, аудан орталығындағы LED экрандарда бейнероликтер көрсетілуде. Бұл жұмыстар облыстық статистика департаменті және ауылдық округ әкімдерімен бірлесе ұйымдастырылды.
Санақ барысында жиналған барлық мәліметтер құпия сақталады және тек статистикалық мақсатта қолданылады. Халық тарапынан берілетін жауаптар негізінде ауыл шаруашылығы саласының даму бағыты арқылы айқындалады.
Ұлттық ауыл шаруашылығы санағы – бұл жай ғана есеп емес, ауылдың ертеңіне үлес қосу. Бұған әрбір тұрғынның қатысуы — ауыл болашағы үшін маңызды.
Ұлытау ауданы тұрғындарын осы санаққа белсенді қатысуға шақырамыз!

Елдос ӘБДІРАЙЫМ,
Ұлытау ауданының статистика
бөлімінің басшысы.