Міндеттер ауқымы айқындалды
Аудан әкімі Советбек МЕДЕБАЕВ арнайы барып қатысқан Жезді кентінің әкімі Мұратбек ЖҰМАБЕКОВТЫҢ тұрғындар алдындағы өткен жылдың қорытындысы бойынша есеп беру кездесуі қос тараптан да байыпты әңгіме қозғалуымен ерекшеленді. Есепті баяндамада жүзеге асырылған жұмыс көлемі мен алдағы жоспарлар толықтай екшелді.
Советбек Тұрсынұлы өзінің кіріспе сөзінде аудан аумағында, оның ішінде Жездіде жүргізілген жұмыстарға жүйелі талдау жасап, алдағы міндеттер ауқымына қысқаша шолу жасады. Сонымен қатар, істі ұйымдастыру жолдарын тиімді бағамдау мақсатында жиынға қатысушыларды ашық әңгімеге шақырды.
Осы орайда жаңа лауазымға сайланғанына әлі айтарлықтай уақыт кезеңі өте қоймаған Мұратбек Досымбекұлының кент аумағындағы жұртшылықтың көңілін көншіте қоймайтын түйткілді тұстарды жетік зерделеп үлгергені әрі олардың түйінін тарқатуға қатысты нақты ұстанымдары бар екендігі анық аңғарылды.
Өз кезегінде жергілікті қауым өкілдері өздерін толғандыратын мәселелерді еш бүкпесіз қозғады. Атап айтқанда, аурухананы талапқа сай жөндеуден өткізу, жекелеген көшелердегі үйлерге су тарату колонкаларынан ауызсу тартып беру, кент ішіндегі жолдардың сапасын жақсарту, медицина мекемесін білікті дәрігерлермен қамтамасыз ету, газ құбырын жеткізу жайы, сырттан келетін мамандар мен баспана кезегінде тұрған азаматтар үшін жаңадан үйлер салу, орталықтандырылған жылыту қазандығы құрылысын бастау мүмкіндігін ойластыру және басқа да біршама өзекті сауалдарды алға тартты.
Тұрғындар тарапынан қозғалған мәселелер бойынша аудан әкімі, кент әкімі және аудандық деңгейдегі өзге де құзырлы мемлекеттік құрылымдардың басшылары тұщымды жауаптар берді.
Кездесу барысында Советбек Медебаев республикалық «Өмір – айна» журналының қолдауымен жарық көретін жылдың үздіктеріне арналған «Үздік.kz» кітабына есімдері енгізілген Жезді кенті Мәдениет үйінің режиссері Шахмаран Искаков пен музыка маманы Азамат Смағұловтың омырауына «Абырой» төсбелгілерін тақты. .
Өз тілшімізден.
