Еңбек адамы қашанда елдің баласы. Ерінбей еткен еңбектің берекесі де мол болмақ. Бүгінде елімізде жұмысшы мамандарға құрмет көрсету алдыңғы орында тұрған мәселе. Ең бастысы, әр адам өз жұмысына ыждағаттылықпен, жауапкершілікпен қараса болғаны. «Еңбек етем, жағдайымды жақсартам» деген азаматтар – әркез тынбай еңбек етіп жатса, ізгі арманына қол жеткізе алады. Сондай байыпты азаматтың бірі – Төлеубек Айманов. Ол бақытын еңбектен тапқан жан. «Табыс кілті – еңбекте» екенін ерте ұғынғандығынан болар, жастайынан көлікті тізгіндеп, бүгінде елудің белесіне шықса да өмірінің отыз жылын жол үстінде өткізіп келе жатқан автокөлік жүргізушісі.
Кейіпкеріміздің өмірдастаны Шеңбер ауылынан тамыр тартады. 1971 жылы Қорғасын өлкесінде туған. 1989 жылы туған жеріндегі орта мектепті бітіріп, күз айында әскер қатарына шақырылады. Отан алдындағы борышын ойдағыдай аяқтап келіп, 1991 жылы Жезқазған қаласындағы жүргізушілер дайындайтын курсты тәмамдайды. Қазақта «Әке көрген оқ жонар» деген тамаша тәмсіл бар ғой. Оның әкесі Совет (Қажымұқан) өмірінің соңына дейін көлік жүргізуші болып кеңшарда еселі еңбек еткен кісі. Төлеубек те бала жасынан техникаға жақын болып өсті. Бозбала шағынан алдыңғы қатарлы көлік жүргізушілерінен қалыспай, қатарласа еңбек етті. Аға буыннан техника жөндеудің қыр-сырын үйренген ол, қазір өзі де техника тілін бес саусақтай білетін майталман жүргізушіге айналды. Кез келген техниканың құлағында ойнайтын кәнігі маман. Бір жылдары көктемгі егіс науқанына қатысып, ДТ тракторымен жерге дән сіңірсе, орақ науқанында «Енисей» комбайнымен егін де орды. МТЗ 82 тракторын тізгіндеп, шөп те шапты. Сөйтіп, ауылдың күйбең тірлігіне төселді. Ағасы Бейсенбайдың шаруа қожалығында да бірталай жыл еңбек етті.
Қазір ол – Шеңбер ауылдық округі әкімінің көлік жүргізушісі. Бұл салада еңбек еткеніне де он жеті жылдай уақыт болыпты. Осы аралықта 7-8 әкім де ауысты. Солардың бәрімен Төлеубектің сыйластығы түзу. Әкім болған азаматтардың да оған өкпе-назы жоқ. Барлығы оның атына жақсы пікір айтуда. Олай болатын реті де бар. Тәуліктің кез-келген сағатында Төлеубектің көлігі жолға сақадай-сай тұрады. Әкімшілік тарапынан берілген тапсырмаларды да мүлтіксіз орындайды. Әрдайым өз ісіне мығым жігіт, жұмысында да абыройсыз емес. Өз ортасында сыйлы. Ол қарапайым жүргізуші болғанымен, ауыл халқы алдында беделді. Жерлестері де оны құрмет тұтады, қадірлейді. Төлеубектің де ауылдастарына деген пейілі кең. Қалаға бара қалса, ауыл халқының тапсырған заттарын базар жағалап алып жүргені. Осындай қасиетімен ауылдықтарға қадірлі. Ешкімді ренжітпеуге тырысады. Қашан көрсең де адамдық қалпынан айнымаған өнегелі азамат. Қазақы әдепті бұзбаған, сыйластықтың сырын білетін жан.
Бүгінгі күні Төлеубек Советұлы берекелі жанұяның отағасы. Зайыбы Айнұр екеуі төрт бала тәрбиелеп-өсіріп, бақуатты ғұмыр кешіп отырған үлгілі отбасы.
Қайрат ЖҰМАБАЙ.
