Марапат тұғырында

Аудан әкімдігінде ауыл шаруашылығы мен статистика күніне орай салтанатты жиын ұйымдастырылып, ауданның әлеуметтік-экономикалық дамуына үлес қосқан сала мамандары мен ауыл еңбеккерлеріне құрмет көрсетілді.

Жиында аудан әкімінің орынбасары Алмаз Қайырбек пен «Ауыл шаруашылығы қызметкерлерінің салалық кәсіптік одағы» Қоғамдық бірлестігінің Ұлытау облысы бойынша филиал төрағасы Мақсұт Оспанов мереке иелерін төл мерекелерімен құттықтап, жылы лебіздерін білдірді.
Бұл жолғы жиында да әдеттегідей, еңбегімен көзге түскен еңбек адамдарының еңбегі еленіп, түрлі деңгейдегі марапаттарға ие болды. Әуелі аудан әкімінің орынбасары Алмаз Қайырбек ауыл еңбеккерлері Думан Маханов пен Алтай Жауқасыновтың омырауына «ҚР Ауыл шаруашылығы саласының үздігі» төсбелгісін тақты. Бұдан кейін Ұлытау ауданының Құрмет грамотасы тапсырылды. Бұл марапатқа өңірдің қоғамдық-саяси өміріне белсенді қатысқаны және әлеуметтік-экономикалық дамуына қосқан үлесі үшін «Аққошқар» шаруашылығының иегері Мұрат Әлмағамбетов пен аудандық статистика бөлімінің басшысы Елдос Әбдірайым иеленді.
Марапаттау рәсімі тағы да жалғасып, бір топ азаматқа аудан әкімінің Алғыс хаты берілді. Марапатталғандардың қатарында «Стамқұлов» шаруа қожалығының басшысы Нұрлан Стамқұлов, жеке кәсіпкер Айгүл Тұрмағамбетова, «Балтабай» шаруа қожалығының қызметкері Дархан Боранбеков, «Бекімбетов» шаруа қожалығының қызметкері Ержан Балғабаев бар.
Мереке аясында еңбегімен ерекшеленіп, жұмысында жоғары нәтиже көрсеткен азаматтар салалық кәсіподағының марапаттарына ие болды. Атап айтсақ, «Бекетай-Баба» шаруа қожалығының механизаторы Сәкен Ахасов I дәрежелі «Еңбек даңқы» төсбелгісіне иеленді. Келесі кезекте «Елеулі еңбегі үшін» төсбелгісімен Аманкелді ауылдық округінің ветеринариялық фельдшері Нұрбек Айтбаев, «Бекетай-Баба» шаруа қожалығының қызметкері Рафаэль Рашитұлы, аудандық ветеринариялық станцияның статист маманы Нұржан Кәрімов марапатталды. Сонымен қатар, салалық кәсіподақ бірлестігінің Құрмет грамотасын Қорлан Берлібекова мен Алтын Бәрменова алды.
Марапаттарды «Ауыл шаруашылығы қызметкерлерінің салалық кәсіптік одағы» Қоғамдық бірлестігінің Ұлытау облысы бойынша филиал төрағасы Мақсұт Оспанов табыс етті.

Қайрат ЖҰМАБАЙ.