Сарқылмас рухани қазына

Халықаралық балалар кітабы күніне орай, аудандық балалар кітапханасы Қазақстандағы балалар мен жасөспірімдердің кітап оқуын қолдау жылы аясында кітап апталығын өткізді.

Апталықтың алғашқы күнін ұйымдастырушы тарап «Өркен» балабақшасында ұйымдастырды. Жылжымалы кітапхана аясында дыбыстық кітап, ашылмалы кітап, басқадай түрлі пішіндегі құрастырмалы буындап оқитын кітаптарды қалай пайдалану керектігін түсіндіріп, бүлдіршіндерге қызықты ертегілерді оқып берді. Келесі күні «Кітап əлемді бағындырады» тақырыбында ашық есік күні өткізілді. Аталған іс-шараны кітапхана библиографы М.Елеуова жүргізіп, жас оқырмандармен ой бөлісті. Бұдан кейінгі шара «Бақытты балалық», «Бауырсақ» ертегілері арқылы қуыршақ қойылымымен жалғасты. Жалпы айтқанда, аптаның əр күні қызыққа толы болды. «Жүзден жүйрік» тақырыбы аясында балалар мақал-мəтел, жұмбақтар айтып, логикалық сұрақтарға жауап берді. «Менің сүйікті кейіпкерім» тақырыбында балаларға сурет салдыртып, шығармашылық қабілеттерін шыңдады. Апталықтың соңы «Кітап — ұлттың қазынасы» атты көрмені тамашалаумен аяқталды. Қорытындысында шараға белсене қатысқан жеткіншектерге аудандық балалар кітапханасының Алғыс хаты тапсырылды.

 Аудандық балалар кітапханасы.