Жастар – жарыс жолында

Ұлытау ауданы орталығында салауатты өмір салтын насихаттау мақсатында «Салауатты өмір – жарқын болашақ» атты қыздар арасында волейболдан жарыс ұйымдастырылды.

Іс-шараның басты мақсаты – жастар арасында нашақорлықтың алдын алу, денсаулықты сақтау және спортқа деген сүйіспеншілікті арттыру. Осы мақсатпен ұйымдастырылған шара барысында Ұлытау ауданы прокурорының міндетін атқарушы, әділет кеңесшісі Сәбит Серімбетов құттықтау сөз сөйлеп, қатысушыларға сәттілік тіледі.
Жарысқа үш команда қатысты. Олар «Самға», «Алаш», «Сұңқар» болып үшке бөлінді. Жарыс өте жоғары деңгейде өтіп, қыздарымыз ұйымшылдығы мен жігерлілігін көрсетті. Әр команда жеңіске лайық ойын өрнегін ұсынды. Дегенмен, спортта мықтысы анықталуы тиіс екені белгілі. Сонымен, әділқазылар алқасының шешімі бойынша «Алаш» командасы жеңімпаз атанды. Жеңімпаз команда арнайы марапатталып, сонымен бірге қатысушыларға Алғыс хаттар табысталды.
Жарыс қорытындысында ұйымдастырушы тарап жастарға – бүгінгі спорттық шараның басты негізі – салауатты өмір салтын таңдау деп айта келе, әрдайым спортпен шұғылданып, биік шыңдарға бірге самғай беріңдер деп атап өтті.
Негізінде, бұл іс-шараны Ұлытау ауданының прокуратурасы, аудандық Жастар ресурстық орталығы және ауданның спорт орталығы бірлесіп ұйымдастырды.
Бұл жарыс аудан жастарын тек спортқа бейімдеу ғана емес, сонымен бірге бірлікке, мықтылыққа және табандылыққа бастайтын маңызды қадам болды.

Ақбота ЕСЕНҚАБЫЛ.