Мал қорымы пайдалануға берілді
Борсеңгір ауылында ауыл шаруашылығы мен экология қауіпсіздігі бағытында маңызды қадам жасалды. Ауылда ветеринариялық-санитариялық талаптарға толық сәйкес келетін жаңа мал қорымы ресми түрде іске қосылды.
Аталған нысан мал өлекселерін қауіпсіз түрде залалсыздандыру және көму жұмыстарының барлық санитариялық нормаларды сақтай отырып жүргізілуіне мүмкіндік береді. Қорымның құрылымы заманауи талаптарға сай жабдықталып, экологиялық қауіпсіздік пен адам денсаулығын қорғау мақсатында арнайы оқшауланған аумақта орналастырылған.
Жоба ауыл тұрғындарының ұсынысы негізінде дайындалып, аудандық бюджет есебінен қаржыландырылды. Құрылысы барысында экологиялық және ветеринариялық қадағалау органдарының талаптары толық ескерілді.
Ауыл тұрғындары бұл бастаманы зор қуанышпен қабылдады. Олардың айтуынша, жаңа мал қорымы елді мекендегі эпизоотиялық жағдайдың тұрақтануына, қауіпті аурулардың таралуының алдын алуға елеулі үлес қосады.
Борсеңгір ауылының тұрғыны, ардагер мал дәрігері Сейітхан Әбдірахманов бұл ауыл үшін аса қажетті нысан екенін айтты.
– Бұрын мал індетінен қырылған жағдайда, өлексені санитариялық талапқа сай көму қиындау болатын. Енді ондай мәселе туындамайды. Бұл – халықтың денсаулығын қорғауға тікелей бағытталған игі қадам, – деді.
Аудан әкімдігі алдағы уақытта ауыл шаруашылығы саласында қауіпсіздік пен санитариялық бақылауды арттыру үшін ауданға қарасты өзге елді мекендерде де осындай талапқа сай мал қорымдарын кезең-кезеңімен іске қосуды жоспарлап отыр. Бұл жұмыстар нақты жоспарға енгізіліп, жауапты мекемелерге міндеттер жүктелген.
Жаңа мал қорымының ашылуы – тек Борсеңгір ауылы үшін ғана емес, бүкіл ауданның экологиялық тұрақтылығы мен ветеринариялық қауіпсіздігін қамтамасыз етудегі маңызды оқиға.
Ізтай БЕЛГІБАЙҰЛЫ.
