Құрылысшылар құрмет төрінде
Ұлытау облысында Құрылысшылар күніне арналған салтанатты жиын өтті. Іс-шараға облыс әкімі Дастан Рыспеков қатысып, сала мамандары мен ардагерлерін кәсіби мерекелерімен құттықтады. Өңір басшысы құттықтау сөзінде құрылыс саласы мамандарының аймақтың әлеуметтік-экономикалық дамуына қосқан үлесі зор екенін атап өтіп, еңбектеріне табыс тіледі.
«Қазіргі таңда заманауи Конгресс-холл, Мұз аренасы бар спорт сарайы және жаңа емхана салу жоспарлануда. Сонымен қатар, сыйымдылығы 3000 адамдық мешіттің құрылысы басталды. 25 тамызда Оқушылар сарайының алғашқы іргетасын қалау рәсімін өткізбекпіз. Бұл нысандардың әрбір кірпіші – сіздердің маңдай терлеріңіздің және адал еңбектеріңіздің айғағы», – деді Ұлытау облысының әкімі Дастан Рыспеков.
Мерекелік жиында бірқатар сала қызметкері «Ерен еңбегі үшін» медалімен, ҚР Премьер-Министрі мен Үкімет басшысы орынбасарының Алғыс хаттарымен, ҚР «Құрметті құрылысшы», ҚР «Құрметті сәулетші» төсбелгілерімен, сондай-ақ облыс әкімінің Алғыс хаттары және Құрмет грамоталарымен марапатталды.
Сәулетші, құрылысшы, инженер, жобалаушы сынды мыңдаған маманның еңбегін ұлықтайтын мереке жергілікті өнерпаздар мен эстрада жұлдызы, жерлесіміз Нұржан Керменбаевтың қатысуымен өткен концерттік бағдарламамен жалғасты.
