«ULYTAU GO» жазғы лагері өңір жастарының басын қосты

Шілде айының 29 мен 31-і аралығына облыс орталығында жастарға арналған «ULYTAU GO» жазғы лагері болып өтті. Аталмыш шара облыстық қоғамдық даму басқармасының мемлекеттік әлеуметтік тапсырмасы аясында ұйымдастырылды.

Жастарды біріктіруге және жанжақты дамытуға бағытталған шараға Жезқазған, Сатбаев, Қаражал қалалары мен Жаңаарқа, Ұлытау аудандарынан барлығы 50-ден астам ерікті және белсенді жастар қатысты.
– Осы семинардан сіздер барынша өздеріңізге қажетті дағдыларды қалыптастырып, қажетті дүниелерді үйреніп, оны ары қарай өздеріңіздің өмір жолдарыңызда, ертең еңбекке араласасыздар сол кезде пайдаланарсыздар деп ойлаймыз. Бұл басқосу сіздерге пайдасы, септігі мол жиын болады деген сенімдеміз. Лагердің барлық қатысушыларына, осы лагердің жұмысына сәттілік тілейміз, – деді жазғы лагердің ашылу салтанатында сөз алған облыстық қоғамдық даму басқармасының басшысы Дархан Мұхан.
Үш күнге созылған жастар лагерінің арнайы бағдарламасы бойынша алғашқы күні «Ораторлық қабілетті арттырудың тиімді жолдары» тақырыбында Астанадан кәсіби Медиа-тренер Сәнді Сұлтан арнайы келіп, тренинг ұйымдастырды. Сондай-ақ «Zhakifilms» негізін қалаушы Азамат Жақиянов «Мобилография ерекшелігі» тақыбында шеберлік сағатын өткізеді.
– Ұлытау облысына келгеніме өте қуаныштымын. Жезқазған қаласында ең белсенді, ең ақылды, ең әдемі жастарымен кездесіп тұрмын. Өзімнің жеке мастер-класымды жүргізіп жатырмын. Бүгінгі біздің Қазақстанның болашағы осы жастардың қолында ғой. Сондықтан өзімнің бар білгенімді жеткізгім келеді, пайдалы болғым келеді, сол үшін келдім, – дейді медиа-тренер Сәнді Сұлтан.
Ал, форумға қатысушы жастар мұндай ілкімді істің үзіліп қалмауын қалайтындарын ашық жеткізді.
– Алдағы уақытта бізде дәл осындай лагерлер болғанын қалаймыз. Ұйымдастырушыларға үлкен алғысымызды білдіреміз. Жан-жақтан тоғысқан балалар бір-бірімен танысып-білісіп, бір-бірлеріне деген өздерінің құрметтерін көрсетіп, жазғы лагеріміз өте жоғары деңгейде өтуде, – дейді лагерь қатысушы Жасұлан Жахин.
Үш күнге созылған жазғы лагерь қатысушылардың «Жошы хан» тарихи-мәдени кешеніне экскурция жасауымен қорытындыланды. Лагерьге әр өңірден келген делегаттар өздерінің қабілеттерін шыңдады, білімдерін жетілдірді.

Ізтай БЕЛГІБАЙҰЛЫ.