ШЕҢБЕРДЕ — «Beeline» байланысы

Кейінгі жылдары халықтың сұранысын өтеуде ұтымды істерімен ерекшеленуге машықтанған Шеңбер ауылдық округінде тағы да бір жағымды жаңалық орын алды. Енді жергілікті тұрғындар «Beeline» байланыс операторының қызметін еш кедергісіз пайдаланатын болады.

Осы орайда, бұған дейін жергілікті әкімдік пен ауылдың белсенді азаматтарының ілкімді әрекеттерінің арқасында арнайы қондырғы орнату арқылы халықтың Wi-Fi игілігін еркін тұтынуға қол жеткізгенін айта кеткен жөн.

– Ұялы телефон байланысы ауылдағы ағайынның ұзақ жылдардан бергі арманы еді. Бұқараның сол арманы орындалды. Тұрғындардың, әсіресе, бала-шағасы туған ауылынан тысқары өңірлерде тұрып жатқан жандардың шаттануы ерекше. Бұл – ел мүддесін ескере отырып қабылданған мемлекеттік бағдарламаның жемісі. Алтын бесіктен ұзамаған қауымның жетістігі мен қуанышы жыл санап еселене түсуі – уақыттың өзі алға шығарған талап, – дейді ауылдық округ әкімі Сағат Сұлтанов.

Тәслима ОРАЗАЛЫҚЫЗЫ

ҚОРҒАСЫН ауылы.