Бірлікті ту еткен сайыс
Ұлт ұясы – Ұлытаудың спорт кешенінде аудандық полиция бөлімінің ұйымдастыруымен волейболдан турнир өтті. Турнир құқық қорғау саласында еңбек еткен Бағдат ƏЙТЕНОВ, Бауыржан ЕЛЕУСІЗОВ, Нұрлан БЕГАЕВ, Мəулен БАЙБОЛОВ, Дархан ОМАРОВ, Жасұлан ДҮЙСЕМБАЕВТЫ еске алуға арналды. Алдымен, мемлекеттік Əнұран шырқалып, шараға қатысушылар марқұмдарды бір минут үнсіздікпен еске алды. Мұны аудан жұртшылығы дүниеден озған полиция қызметкерлерінің рухына арналған құрмет деп қабылдады.
Тартысты бəсекеде Жезді кенті, Ұлытау, Қаракеңгір, Аманкелді ауылдарынан 10 команда қатысып, ымыра-бірлікпен мəдениетті ойын көрсетті.
Турнирдің ашылу рəсімінде аудан əкімінің орынбасары Алмаз Қайырбек сөз алды. Құқық қорғау органында қызмет еткен марқұмдардың рухына арналған сайыстың өзіндік мəнін түсіндірді. Сөз соңында жарысқа қатысушыларға сəттілік тіледі. Өз кезегінде аудандық полиция бөлімінің басшысы, полиция подполковнигі Руслан Ділмұхамедов марқұмдардың отбасындағы ата-аналарына, жан-жарына, бауырларына арнайы əзірленген төсбелгілерді табыс етті.
Алдымен, Бағдат Əйтеновтің зайыбы – Зəйра Қабашеваның омырауына «Офицердің жұбайы» төсбелгісін тақты. Бұдан кейін Бауыржан Елеусізовтің қарындасы – Динара Елеусізоваға «Қазақстан патриоты», Нұрлан Бегаевтың əкесі – Төкен Бегаевқа «Офицердің əкесі», Мəулен Байболовтың зайыбы – Əмина Балтабековаға «Офицердің жұбайы», Дархан Омаровтың анасы – Айгүл Жұмановаға «Офицердің анасы», Жасұлан Дүйсембаевтың əкесі – Сүйіндік Дүйсембаевқа «Офицердің əкесі» төсбелгілерін табыстады.
Келесі кезекте аудандық полиция бөлімінің ардагерлер кеңесі төрағасы Хайдарбек Ержанов ізгі лебізін білдіріп, зейнеткерлікке шыққан полиция ардагерлерін марапаттады. Марапатталғандардың қатарында Қанат Ниязов, Қанағат Есмағанбетов, Жаннұр Оразаев, Сұңғат Есенғалиев, Жасұлан Жанділдинов бар.
Жалпы, тартысқа толы бəсеке өз мəнінде өтті. Полиция қызметкерлері мен ардагерлері жарыстың басы-қасында болып, турнирді жоғары деңгейде өткізе білді. Команда жеңімпаздары мен жүлдегерлері Диплом жəне медальдармен марапатталып, кубок табыс етілді.
