Жұмысшы маман – бағалы

Қазіргі заманда қоғамның дамуына үлкен үлес қосатын мамандықтардың бірі – жұмысшы маман. Жұмысшы – бұл нақты еңбекпен айналысатын, қолымен іс тындыратын, өндіріс, құрылыс, көлік, ауыл шаруашылығы сияқты салаларда табанды еңбек ететін адам. Олар біздің күнделікті өмірімізді жеңілдетіп, қоғамның іргетасын қалайды.

Жұмысшы мамандар – бұл дәнекерлеуші, токарь, жүргізуші, құрылысшы, механик, электрик сияқты көптеген мамандық иелері. Олардың еңбегі көзге көп көріне бермесе де, қоғам үшін аса маңызды. Мысалы, құрылысшы болмаса, жаңа үйлер мен мектептер салынбас еді, электрик болмаса, жарық та, жылу да болмас еді. Сондықтан жұмысшы еңбегі – аса құрметті еңбек.

Бүгінде елімізде жұмысшы мамандықтарына деген сұраныс артып келеді. Техникалық білім беру жүйесі дамып, кәсіптік колледждерде жаңа буын мамандар дайындалуда. Мемлекет те бұл бағытта қолдау көрсетіп, «Жас маман», «Серпін» сияқты бағдарламалар арқылы жастарды жұмысшы мамандықтарына тартуда.

Жұмысшы болу – оңай емес, бірақ ол – нағыз еңбекті бағалай білетін, табанды, тәртіпті, жауапты адамдардың ісі. Мұндай мамандық иелері әрдайым сұранысқа ие, әрі тұрақты жұмысқа ие бола алады.

Қорытындылай келе, жұмысшы маман – ел экономикасының қозғаушы күші. Олардың еңбегін бағалау, құрметтеу – әрқайсымыздың азаматтық борышымыз. Еңбекті сүйетін, елге пайда әкелетін нағыз маман болу – үлкен абырой.

Маржан БУЛЕГЕНОВА,
белсенді жас.