Үздіктер – құрмет төрінде

Жаңа жыл қарсаңында аудандық Мəдениет үйінде өткізілген игі шаралар мол. Соның бірі – «Жыл үздігі-2022» номинациясын табыстау кеші. Аталған аталым бойынша əр сала үздіктері марапатталып, құрмет биігінен көрінді.

Жиынға аудан əкімі Аманжол Мырзабеков арнайы қатысты. Ашылу салтанатында сөз алған аудан басшысы жұртшылықты Жаңа жыл мерекесімен құттықтап, жүрекжарды тілегімен бөлісті.

Алдымен, ауданның саяси жəне қоғамдық өміріне белсене араласқан өңірдің əлеуметтік-экономикалық дамуына елеулі үлес қосқан сала майталмандарына құрмет көрсетіліп, лайықты сый-сияпат жасалды.

Жүзден жүйрік шыққан үздіктерге тоқталсақ…

«Білім саласының үздігі» – Күлпəш Тəліпова, «Үздік депутат» – Жарқынбек Бөлендин, «Медицина саласының үздігі» – Гауһар Қозыбаева, «Үздік мемлекеттік қызметкер» – Дүйсен Бекмағанбетов, «Үздік əкім» – Сағат Сұлтанов, «Үздік полиция қызметкері» – Досбол Кенжебаев, «Мəдениет саласының үздігі» – Гүлмира Сыздықова, «Ауыл шаруашылығы саласының үздігі» – Нұрлан Байтуғанов, «Ветеринария саласының үздігі» – Байжұман Омаров, «Спорт саласының үздігі» – Аманбек Баймағанбетов, «Үздік əлеуметтік сала қызметкері» – Айна Əбілова, «Бұқаралық ақпарат құралдары саласының үздігі» – Қайрат Жұмабаев, «Кəсіпкерлік саласының үздігі» – Ермек Жүнісов. Сондай-ақ, «Үздік коммуналдық сала қызметкері» аталымында Еркін Жеңсікбаев марапатталды.

Марапаттау рəсімі одан кейін де жалғасты. Аудандық экономика жəне қаржы бөлімінің басшысы Тасболат Шайхин, аудандық ауыл шаруашылығы бөлімінің басшысы Сағади Обайдуллин, аудандық мəдениет үйінің директоры Гүлжан Көпеева – Ұлытау облысының Құрмет грамотасымен марапатталды.

Ұлытау ауданы əкімінің Алғыс хатына – аудан əкімі аппаратының іс-қағаз жүргізушісі Нұргүл Орманбек пен аудандық мемлекеттік архивінің бөлім басшысы Елдос Кенжеғали ие болды.

Құттықтау легін аудандық мəслихат хатшысы Ахат Құрмансейітов те жарасымды жалғастырды. Өз кезегінде мəслихат хатшысы Ұлытау ауданының Құрмет грамотасын – аудан прокуроры Рахымжан Рахатовқа, аудандық балалар мен жасөспірімдер спорт мектебінің директоры Марғұлан Сəбденовке, аудан əкімі аппаратының бөлім басшысы Ғабиден Дүкенбаевқа «Спецстрой LTD» ЖШС инженері Асылбек Қосмағамбетовке табыс етті.

Жиында ауыл шаруашылығы, қайта өңдеу ұйымдары жəне мемлекеттік мекемелер қызметкерлерінің жергілікті кəсіподақ төрағасы Шаяхмет Үмбетов те ҚР Ауыл шаруашылығы кəсіподағы қоғамдық бірлестігінің марапатын табыстады. ІІІ дəрежелі «Еңбек даңқы» төсбелгісін – «Қазақстан фермерлер қауымдастығы» заңды тұлғалардың жəне кəсіпкерлер қауымдастық нысанындағы бірлестігінің Ұлытау облысы бойынша филиалы төрағасы Бауыржан Бегеновтың омырауына тақты.

Мəні мен салмағы келіскен салтанаттың көркін əдемі əн мен би аша түсті. Жыл қорытындысына арналған жиын концерттік бағдарламамен қорытындыланды.

Қайрат ЖҰМАБАЙ