Қысқа дайындық – қам-қаракеттің өлшемі

Аудан әкімі Аманжол Мырзабековтың төрағалығымен өткен кеңейтілген аппарат мәжілісінде күн тәртібіне қойылған мәселелердің әрқайсысы тікелей ел тұрмысымен байланысты. Жиынға аудандық мәслихаттың төрағасы Ахат Құрмансейітов, аудан әкімінің орынбасарлары, бөлімдер мен мекемелердің басшылары, кент және ауыл әкімдері қатысты.

Аудан үшін ең өзекті тақырыптың бірі – алдағы қысқа дайындық. Қыстың ызғарын ерте сезінетін өңір халқы үшін бұл жай ғана техникалық шара емес, әрбір отбасының жылуы мен жайлылығы, балалардың сабаққа алаңсыз баруы, қарттардың денсаулығы мен көңіл тыныштығы.
Әкім мәжілісте әлеуметтік нысандарды дер кезінде жылытуға дайындау, су мен электр желілерін қалыпқа келтіру жұмыстарын жеделдетуді тапсырды. Әсіресе, Борсеңгір ауылдық клубын қалпына келтіру – ауыл тұрғындарының мәдени өміріне серпін беретін маңызды қадам екені атап өтілді.
Ауыл шаруашылығы – ауданның тірегі. Ұлттық ауыл шаруашылығы санағы жүргізіліп жатқан шақта әрбір жеке қосалқы шаруашылықтың есебі алынуы – ертеңгі күннің жоспарлы дамуына жол ашады.
– Бұл санақ – жай ғана статистика емес, ол ауылдағы әр отбасының еңбегін бағалау, соның негізінде мемлекеттік қолдау тетіктерін айқындау, – деген әкім ауылдық округтерде түсіндіру жұмыстарын күшейтуді тапсырды.
Жаңа оқу жылы қарсаңында мектептердің көмірмен қамтылуы, жылыту жүйесінің дайын болуы, ұстаздар кадры мәселесі – әрбір ата-ананы алаңдататын жайт. Мәжілісте жас мамандарды ауылдық мектептерге тарту мәселесіне ерекше тоқталды. Бұл ауылдағы білім сапасын көтеруге, балалардың тең мүмкіндік алуына жағдай жасайды.
Жиын қорытындысында аудан әкімі жауапты тұлғаларға нақты мерзімдер белгіленген тапсырмалар берді. Хаттаманың орындалуын бақылау аудан әкімі аппараты басшысының міндетін атқарушы Әлия Буралхинаға жүктелді.
Кеңейтілген аппарат мәжілісі – ауданның тіршілігіне тікелей әсер ететін маңызды шаралардың шешімін табатын алаң. Қысқа қам-қарекет, ауыл шаруашылығы санақтары мен білім беру саласының өзекті мәселелері уақытылы шешімін тапса, тұрғындардың тұрмыс сапасы да жақсарып, ауданның даму қарқыны арта түсері сөзсіз.

Ізтай БЕЛГІБАЙҰЛЫ.