Сенаторлар – Мибұлақ ауылында
ҚР Парламенті Сенатының депутаттары Серік Шайдаров, Советбек Медебаев және облыстық мәслихаттың төрағасы Бауыржан Шыңғысов бастаған лауазымды тұлғалар Ұлытау ауданына қарасты Мибұлақ ауылына арнайы сапармен барды. Топ құрамында аудандық мәслихат төрағасы Ахат Құрмансейітов пен аудан әкімінің орынбасары Аян Әбжамалов болды.
Сенаторлардың аудан орталығынан алшақтау орналасқан ауылдағы сапары фельдшерлік-акушерлік пункттің жергілікті тұрғындарға қызмет көрсету үдерісімен танысудан бастау алды.
Бұдан кейін мәдениет ошағында ауыл халқының өкілдерімен мақсатты негізде жүздесіп, олардың талап-тілектері мен ұсыныстарына құлақ түрді. Екіжақты терең түсіністік орныққан, «еркін микрофон» ахуалындағы емен-жарқын әңгіме мен пікір алмасулар кезінде сенаторлар мен облыстық мәслихат төрағасы жергілікті қауым өкілдері мен ауылдық округ әкіміне істі ұтымды ұйымдастыру мен бастаған шаруаны ілгері бастыруға қатысты бағалы ұсыныстар берді.
Кездесу түйінінде Жаңбырбай Алтайбеков бастаған ауыл ақсақалдары мен белсенді азаматтары меймандарға шынайы ризашылықтарын білдіріп, алғыстарын айтты.
Сапар барысында ресми тұлғалар Жезқазған-Қызылорда бағытындағы қайыра жаңғырту және кеңейту жұмыстары жүріп жатқан республикалық маңыздағы автокөлік жолының бірқатар учаскесіне барып, мердігер ұйым өкілдері және салаға жауапты облыстық деңгейдегі мекемелер басшыларымен кездесті. Кездесуде жолға төселетін материалдардың сапасы, жұмысты атқару кестесінің мүлтіксіз орындалуы және тағы да басқа маңызды мәселелер әңгіме өзегіне айналып, оларға қатысты тиісті тұжырымдар жасалды.
Тәслима ОРАЗАЛЫҚЫЗЫ.
