Құрметті аудан тұрғындары! Қадірлі жерлестер!
Сіздерді келіп жеткен Жаңа жылмен шын жүректен құттықтаймыз!
Міне, тағы бір жыл тарих қойнауына еніп барады. Өткен жыл ауданымыз үшін шын мəнінде бірлік пен берекенің, жаңа жетістіктер мен толайым табыстың кезеңі болды деп айтуға болады. Өңірдің əлеуметтік-экономикалық дамуында оң көрсеткіштерге қол жеткіздік.
Мемлекет басшысы Қасым-Жомарт Тоқаев: «Еліміздің баға жетпес байлығы жəне қайта құрудың негізгі қозғалтқышы – адамдар, біздің азаматтар. Сондықтан əр азамат өзінен бастауы керек. Бəрін ортақ іске жұмылдырмайынша, жергілікті əкімдіктер де, қандай да бір саяси шешімдер мен экономикалық тұтқалар да елді жаңарту мақсатына жетелей алмайды», деп Əділетті Қазақстан құрудағы халықтың ерекше рөлін атап өтті. Жаңа жыл Ұлытау өңірінің əр тұрғыны үшін құтты жыл боларына сенімдіміз. Біз бір болып бірлігімізді бекемдей білсек, берекелі ел боламыз.
Қымбатты жерлестер!
Жаңа жылды қашанда алдағы уақыт көшінен қуаныш, жақсылық, жағымды жаңалық күтетін, өткен өмір жолымызға есеп беретін, келешек бағыт-бағдарымыз бен мақсат-міндеттерімізді белгілейтін Үміт, Сенім мерекесі ретінде асыға күтеміз. Өткен жылға өкпе жоқ, ал келер жылдан күтер үмiтiмiз де, тiлер тiлегiмiз де жетерлiк.
Жаңа жылда Сіздерге игілік пен ізгілік, дендеріңізге саулық, шаңырақтарыңызға бақ-береке тілейміз. Тəуелсіз Қазақстанымыздың тұғыры қашанда берік, туы биік болсын! Қасиетті Ұлытау халқының құты мен ырзығы арта бергей! Жаңа жыл құтты болсын, қымбатты жерлестер!
Аманжол МЫРЗАБЕКОВ,
Ұлытау ауданының əкімі.
Ахат ҚҰРМАНСЕЙІТОВ,
аудандық мəслихаттың төрағасы.
