Ұлытау облысында Абай Құнанбайұлының 180 жылдығына арналған онкүндік басталды

2025 жылдың 4–10 тамызы аралығында Ұлытау облысында ұлы ақын, дана ойшыл Абай Құнанбайұлының 180 жылдық мерейтойына арналған мәдени-ағартушылық онкүндік өтуде.

Іс-шаралар легі 4 тамыз күні Ұлытау ауданындағы Абай ескерткішінің жанында өткен танымдық және әдеби-сазды кештермен басталды. Облыстың барлық аудандары мен қалаларында Абай мұрасын ұлықтауға арналған кештер, концерттер, көрмелер, оқулар мен шығармашылық кездесулер жоспарланған.

Жезқазған, Сәтбаев, Қаражал қалаларында және Жаңарқа, Ұлытау аудандарында түрлі форматтағы шаралар, соның ішінде “Абай керуені”, “Абай оқулары”, “Абай мұрасы – мәңгілік қазына” атты әдеби-музыкалық бағдарламалар өтеді.

10 тамыз – Абай күнінде, Жезқазған қаласында гүл шоқтарын қою рәсімі, қорытынды әдеби сапар, облыстық ақындар мүшәйрасы және Абай әндерінен үлкен концертпен онкүндік қорытындыланады.

Аталған іс-шаралар Абайдың рухани мұрасын дәріптеп, жас ұрпаққа өнеге етуге бағытталған.