Ұлытау ауданында облыстық І спартакиада ойындары өтті
Ұлытау ауданының орталығында облыс, қалалар, аудандар мәслихаттары депутаттары мен аппарат қызметкерлері және әр деңгейлі қоғамдық кеңестер мүшелері арасында І облыстық спартакиада өтті.
Сайысқа Ұлытау облысы, Жезқазған, Сәтбаев, Қаражал қалаларының, Жаңаарқа және Ұлытау ауданының командалары қатысты. Жарысқа қатысушыларды Ұлытау облыстық мәслихатының төрағасы Бауыржан Шыңғысов пен Ұлытау ауданының әкімі Аманжол Мырзабеков құттықтап, жылы лебіздерін білдіріп, сайысқа қатысушы командаларға сәттілік тіледі.
Облыстық спартакиада ойындары волейбол, шахмат, дойбы, арқан тартыс, кір тасын көтеру, үстел теннисі сайыстары бойынша өткізілді.
Жарыс қорытындысы бойынша әр спорт түрінен жекелей және командалық ойын бойынша үздік шыққандар марапатталды.
Жалпы, командалық есеп бойынша ІІІ орынды Қаражал қаласы, ІІ орынды Ұлытау ауданы, І орынды Жаңаарқа ауданы жеңіп алды. Жүлдегерлерге дипломдар мен бағалы кубоктар табысталды.
Облыс, қалалар, аудандар мәслихаттары депутаттары мен аппарат қызметкерлері және әр деңгейлі қоғамдық кеңестер мүшелері арасындағы спартакиада ойындары ендігі жылы Жаңаарқа ауданында өткізілмек.
