Балалар күлкісі жаңғырған Сарысу

Қазақстан Республикасы Конституциясының 30 жылдығы аясында Сарысу ауылында көптен күткен балалар ойын алаңы ашылып, ауыл тұрғындары үлкен қуанышқа бөленді.

Салтанатты шараға аудан әкімі Аманжол Мырзабеков, аудандық мәслихаттың төрағасы Ахат Құрмансейітов арнайы қатысып, ауыл жұртшылығын мерекелі сәтпен құттықтады.

Лента қию рәсімінен соң балаларға балмұздақ үлестіріліп, концерттік бағдарлама ұйымдастырылды.
280 шаршы метр аумақта бой көтерген ойын алаңы — ауылдағы жас буынның көптен күткен арманы еді. Заманауи 13 түрлі ойын құрылғысы балалардың ойынын түрлендіріп қана қоймай, олардың бос уақытын тиімді өткізуге жол ашпақ. Бұл игілікті істің жүзеге асуы ауыл тұрғындарының ұсыныс-пікірі негізінде аудандық бюджеттен қаржы қарастырылғанының нәтижесі.
Шара барысында ауыл өнерпаздары әннен шашу шашып, домбыра үні мен әуезді ән ауыл аспанын тербеді. Ақсақалдар ізгі тілектерін арнап, жас аналар мен балалар алғыстарын жеткізді. «Балаларымыздың алаңсыз ойнап, шат-шадыман күлуінен асқан бақыт жоқ» деген тұрғындар жүрекжарды ризашылықтарын білдірді.
Сарысу ауылына сапары барысында аудан басшысы ауыл тұрғындарын жеке қабылдап, олардың ой-пікірлерін тыңдады. Жол, электр қуаты, клуб үйінің абаттандырылуы сынды мәселелер көтерілді. Әкімнің айтуынша, соңғы екі жылда ауылдың ішкі жолдары түгелдей күрделі жөндеуден өткен. Қазір Сарысуға кіреберіс 20 шақырым жолда жөндеу жұмыстары қарқынды жүріп жатыр. Сондай-ақ жаңа су скважинасының тартылуы арқасында ауыл тұрғындары таза ауыз сумен қамтылды.
Балалар ойын алаңының ашылуы – Сарысу жұрты үшін зор қуаныш. Бұл тек ойын алаңы ғана емес, ауылдың келешекке деген сенімі, болашаққа жасалған игі қадам. Балалардың күлкісіне толы бұл алаң ауыл өміріне жаңа серпін беріп, Сарысудың әр шаңырағына қуаныш сыйлағаны сөзсіз.

Ізтай БЕЛГІБАЙҰЛЫ.