Байқоңыр – болат желінің берік буыны

Теміржол – мемлекеттің күре тамыры. Қай кезеңде де халық пен өндіріс, өнеркәсіп пен экономика теміржолмен қатар дамып келеді. Бүгінде еліміздің кең байтақ даласын қақ жарып өтетін темір жол желілері аймақтар арасындағы байланысты нығайтып қана қоймай, жергілікті жерлердің де тынысын кеңейтуде. Соның айқын дәлелі – Жезқазған–Бейнеу теміржолы.

2014 жылы пайдалануға берілген бұл болатжол желісі — Қазақстанның батысы мен орталығын тікелей байланыстыратын аса маңызды көлік дәлізіне айналды. Бұрынғы жылдары жүк пен жолаушыны қиыр айналма жолмен тасымалдау қажет болса, бұл бағыт іске қосылған соң уақыт пен қашықтық айтарлықтай қысқарды. Бұл – экономикалық қана емес, әлеуметтік маңыздылығы зор тарихи оқиға болды.

Осы теміржол бойында Байқоңыр станциясы орналасқан. Қарағанды жол бөлімшесіне қарасты, 5 класты станция 2014 жылдан бері тұрақты жұмыс істеп келеді. Мұнда бүгінде отызға жуық адам еңбек етеді. Олардың көбі вахталық әдіспен, ауысыммен жұмыс істейді. Станцияда бастық, диспетчерлер, вагон қараушылар, жол жөндеушілер мен электр жабдықтарын күтіп-баптайтын қызметкерлер бар. Бұл – теміржолдың бүкіл жүйесі үздіксіз жұмыс істеуі үшін қажет маңызды буындар.
Станция ұжымы – негізінен жергілікті тұрғындар. Олардың арасында өз туған жерінде тер төгіп, табанды еңбек етіп жүрген азаматтар аз емес. Соның бірі – Байқоңыр станциясының бастығы Ерқанат Әбілда. Ерқанат Досболатұлы еңбек жолын осы станцияда кезекші қызметінен бастап, төрт жыл бойы саланың қыр-сырын меңгеріп, бүгінде білікті басшы атанып отыр. Оның әкесі Досболат Әбілда да осы станцияда вагон қараушы болып жұмыс істейді. Әке мен баланың бір салада, бір темір жол бойында еңбек етіп жүргені – кәсібіне деген адалдықтың жарқын көрінісі. Ерқанаттың айтуынша, вагон қараушылар екі адамнан кезектесіп 15 күннен вахтамен жұмыс
істейді. «Сол екі адамның бірі – менің әкем», – дейді ол мақтанышпен.
Жас басшы өз сөзінде «Жезқазған–Бейнеу теміржолы – Ұлытау өңірінің екінші тынысын ашты», дейді. Бұл жолдың салынуы нәтижесінде Байқоңыр, Қарсақбай, Қоскөл сияқты ауылдар мен елді мекендердің экономикалық әлеуеті артып, жұмыс орындары ашылып, тұрғындар тіршілігі жандана түсті. Бұрын жол азабын тартқан ауыл жұрты енді автокөлік іздеп, қалаға сабылмай-ақ, діттеген жеріне пойызбен жететін болды.

Теміржол – елді мекендерді жаңғыртудың, халықты еңбекпен қамтудың, стратегиялық дамудың қуатты тетігі. Ал теміржолшылар – осы қозғалысты қамтамасыз етіп отырған басты күш. Олар жаздың аптап ыстығына да, қыстың қақаған аязына да қарамай, тәулік бойы рельс бойындағы тіршілікті тоқтатпай келеді. Бұл – нағыз ерлікке пара-пар еңбек.
Теміржолшылар күні – осындай қажырлы жандардың мерейлі мерекесі. Бұл күн – ел дамуына үнсіз үлес қосып жүрген мыңдаған еңбек адамына көрсетілер құрметтің бір белгісі.

Досан ДУЛЫҒАЛЫ.