«Қазақконцерт» — Ұлытауда

ҚР Мәдениет және спорт министрлігінің бастамасымен жергілікті атқарушы органдардың қолдауымен Роза Бағланова атындағы «Қазақконцерт» мемлекеттік концерттік ұйымы «Ел бірлігі – Жаңа Қазақстан» жобасы аясында Ұлт ұясына арнайы келді.

«Ел бірлігі – Жаңа Қазақстан» жобасы 2022-2025 жылдар аралығында кезең-кезеңмен іске асырылады. Жобаның діттеген мақсаты – өңір тұрғындары үшін мәдени құндылықтардың қолжетімділігін қамтамасыз ету, өңірлердегі шығармашылық ұжымдар мен артистерді қолдап, ұлттық құндылықтарымызды дәріптеу.

«Қазақконцерт» ұйымының «Ән-жырым саған, Ұлытау» атты концертіне жиналған ұлытаулық жұртшылықтың қарасы көп. Әсіресе, әншілердің қоңыр үнін сағынған ақсақалды аталар мен ақжаулықты әжелерді көріп қуандық. Көрермен сүйікті өнерпаздарын қошеметпен қарсы алып, қолдап отырды. Гастрольдік концерттердің шығармашылық құрамында «Қазақконцерттің» солистері – Қазақстанның Халық әртісі Алтынбек Қоразбаев, Қазақстанның еңбек сіңірген қайраткерлері Ерлан Рысқали, Раушан Оразбаева, Бибігүл Жанузақ, «Дарын» мемлекеттік жастар сыйлығының лауреаттары Азат Мәлік, Күнсұлу Түрікпен, Қазақстанның еңбек сіңірген қайраткері Жанғали Жүзбай, Халықаралық «Славян базары» байқауының жеңімпазы Рухия Байдүкенова, «Меломен» тобы, республикалық байқаулардың лауреаттары Біржан Айтахметов, Дария Бекпенбетова, Райм Тныков бар.

«Мемлекет басшысы Қасым-Жомарт Тоқаев 2022 жылдың 16 наурызындағы Қазақстан халқына Жолдауында «Кең-байтақ қазақ жерінің дәл жүрегінде орналасқан Ұлытаудың төл тарихымыздағы орны ерекше. Ел тағдыры шешілген ұлы жиындар осында өткен. Сарыарқаның төрінде орналасқан бұл аймақтың туристік әлеуеті өте зор. Оның өндірістік қуатын, логистикалық мүмкіндігін ұтымды пайдалану керек. Бір сөзбен айтқанда, біз Ұлытау аймағының дамуына жол ашамыз деп атап өткен еді. Қасиетті топыраққа табанымыз тигеніне, ұлытаулық жұртшылықпен жүздескенімізге біз де ризамыз. Еліміздің сан мыңдаған ғасырдан бастау алатын тарихымен тамырлас ұлттық өнерімізді қасиетті Ұлытау өңіріне ұлықтап насихаттау — Роза Бағланова атындағы «Қазақконцерт» мемлекеттік концерттік ұйымы үшін өткеніміз ғана емес, ертеңімізге жеткізер халқымыздың баға жетпес рухани қазынасын ұлықтау»,- деді Қазақстанның Халық әртісі Алтынбек Қоразбаев.

Кеш соңында аудан әкімінің міндетін атқарушы Мақсұт Оспанов «Қазақконцерт» ұжымына ұлытаулықтардың атынан ризашылығын білдіріп, алғысын айтты. Аудан халқы атынан арнайы Алғыс хат табыстап, ұйымның директоры, Қазақстанның халық әртісі Алтынбек Қоразбаевтың иығына шапан жапты. «Роза Бағланова атындағы «Қазақконцерт» мемлекеттік концерттік ұйымының ұлттық өнерімізге сіңірген еңбегі орасан. Талай дүлдүлдер мен бұлбұлдарды қанаттандырған үлкен өнер ордасына Ұлытау халқының ықыласы ерекше. Өнер әлемінде өркендей беріңіздер»,- деді Мақсұт Сәрсембайұлы.

 Өз тілшімізден.