Қарағандылықтар жүгіруге қатыса отырып 70 қап қоқыс жинады
Қарағанды колледждерінің студенттері «Тазалық күні» акциясына орай спорттық сенбілік форматында өткен плоггингке қатысты. Олар өңдеуге жарамды 70 қап қоқыс жинады.
Плоггинг басталар алдында «Экожастар» мектебінің экотренерлері қоқысты дұрыс жинау және сұрыптау бойынша шеберлік сабағын өткізді.
– Плоггинг – бұл спорттық сенбілік. Мұндай формат қатысушыларға спортпен шұғылдануға ғана емес, сонымен қатар өз қаласын таза ұстауға мүмкіндік береді, – деп атап өтті Қарағанды жоғары политехникалық колледжі директорының тәрбие ісі жөніндегі орынбасары Азамат Екіжанов.
«Сарыарқа дарыны» өңірлік ғылыми-практикалық орталығы басшысының орынбасары Асхат Кәкетаевтың айтуынша, осындай жарыстарды өткізуге болатын орындар санын арттыру жоспарланған.
– Плоггинг форматындағы сенбіліктер жастар арасында танымал болады, сондай-ақ қала тұрғындарының назарын экология проблемаларына аудару құралы болмақ, – деп атап өтті Асхат Кәкетаев.
Сондай-ақ, акция аясында ең жылдам және ең көп қоқыс жинағандар арасында байқау өтті. Жеңімпаздар Sportident электрондық белгі жүйесінің көмегімен анықталды.
Жүгіру қорытындысы бойынша 1-ші орынды Қарағанды жоғары политехникалық колледжі, 2-ші орынды Ә.Молдағұлова атындағы облыстық мамандандырылған мектеп-интернат-колледжі және 3-ші орынды Қарағанды машина жасау колледжі иеленді.
Жеңімпаздар дипломдармен және бағалы сыйлықтармен марапатталды.
