Қарағанды облысының үш мұғалімі Жылдың үздік педагогы атанды

Қостанайда «2021 жылдың үздік педагогы» республикалық байқауының жеңімпаздары марапатталды. Лауреаттарға марапаттарды ҚР Білім және ғылым министрі Асхат Аймағамбетов тапсырды. Атаққа Қарағанды облысының үш мұғалімі ие болды.

Қостанайда салтанатты іс-шара Қазақстан Республикасы Тәуелсіздігінің 30 жылдығы, көрнекті педагог-ағартушы Ыбырай Алтынсариннің 180 жылдығын мерекелеу аясында ұйымдастырылды. Оған елдің үздік мұғалімдері шақырылды.

Биыл республикалық байқауға 173 өтінім келіп түсті. Байқау комиссиясы «Үздік педагог» атағының 64 иегерін анықтады (https://www.gov.kz/memleket/entities/edu/documents/details/216696?lang=ru).

Марапатталғандардың ішінде:

— Әйгерім Бөлкенбаева, Шет ауданының Жамбыл Ақылбаев атындағы  мектеп-гимназияның қазақ тілі мен әдебиеті пәнінің мұғалімі;

— Татьяна Хорошилова, Қарағанды қаласы Нүркен Әбдіров атындағы жалпы білім беретін мектептің математика және информатика пәнінің мұғалімі;

— Перизат Данибекова, «Қазақмыс» Корпорациясының политехникалық колледжінің электротехникалық пәндер оқытушысы (Балқаш қ.).

Жеңімпаздарға «Үздік педагог» төсбелгісі мен 3 млн теңге ақшалай сыйлық табыс етілді.