Міндеттер межеленіп, мамандар марапатталды

Өткен аптаның соңында аудандық Мəдениет үйінде «Білімнің басты құндылықтары: отаншылдық, білімге құштарлық, еңбекқорлық» тақырыбындағы дəстүрлі тамыз кеңесі өтті. Алқалы жиында аудан педагогтері өткен оқу жылын қорытындылап, жаңа оқу жылына дайындықтарын пысықтады.

Тамыз мəслихатын аудан əкімінің орынбасары Алмаз Қайырбек ашып, білім беру саласындағы мемлекеттік қолдау шараларын, саладағы негізгі басым бағыттарды атап өтті. Жаңа оқу жылында педагогтерге сəттілік тіледі.

Өз кезегінде аудандық білім бөлімінің басшысы Бағдат Əбдірайымов əріптестерін жаңа оқу жылының басталуымен құттықтап, білім саласындағы атқарылған бірқатар жұмыстарға жан-жақты сипаттама берді.

Кеңесте аудандық білім бөлімінің бас маманы Гүлназ Тəліпова, Жамбыл Жабаев атындағы №15 тірек мектебінің директоры Айнұр Шалғынбаева, аудандық оқушылар үйінің «Ulytau Media school» студиясының жетекшісі Думан Əден, №12 негізгі орта мектебінің жас маманы Данияр Төрəлі, аудандық балалар өнер мектебінің жас маманы Кəусар Əбдухамитова сөз алып, өз салалары бойынша баяндады.

Дəстүрлі жиында бірқатар мұғалімдер мен сала мамандары өткен жылдың қорытындысы бойынша түрлі марапаттарға ие болды. Атап айтқанда, аудандық балалар өнер мектебінің домбыра пəні мұғалімі Смағұл Жəнібеков, №1 тірек мектебінің математика пəнінің мұғалімі Сəулеш Жеңсікбаева, аудандық білім бөлімінің əдіскері Ерлан Малдыбаев аудан əкімінің Құрмет грамотасымен, №2 Қорғасын жалпы білім беретін мектебінің дене шынықтыру пəнінің мұғалімі Аружан Омаров, аудандық балалар өнер мектебінің мұғалімі Жаңагүл Кенжебай, аудандық оқушылар үйінің мұғалімі Əділет Түсіпбеков аудан əкімінің Алғыс хатымен марапатталды. Марапаттарды аудан əкімінің орынбасары Алмаз Қайырбек табыс етті.

Тамыз мəслихатында сондай-ақ, аудандық білім бөлімінің басшысы Бағдат Əбдірайымов аудандық білім бөлімінің Құрмет грамотасымен Жамбыл Жабаев атындағы №15 тірек мектебінің директоры Айнұр Шалғынбаеваны, №2 жалпы білім беретін мектебінің бастауыш сынып мұғалімі Айгүл Жұматаеваны, Алғыс хатпен №1 тірек мектебі директорының оқу ісі жөніндегі орынбасары Эльмира Тəліпованы, №5 негізгі орта мектебінің кітапханашысы Алтынкүл Қыпшақпаеваны марапаттады.

Бұдан соң Білім жəне ғылым қызметкерлері кəсіподақ кеңесінің Ұлытау ауданы бойынша төрағасы Қанат Жылқыбаев білім жəне ғылым қызметкерлерінің кəсіподағына сіңірген еңбегі үшін «Жезқазған аймақтық білім жəне ғылым қызметкерлерінің жергілікті кəсіптік одағы» қоғамдық бірлестігінің төсбелгісін №6 тірек мектебі оқу ісінің меңгерушісі Күлпаш Тəліповаға, Жамбыл Жабаев атындағы №15 тірек мектебі музыка пəнінің мұғалімі Сəуле Ақдəулетоваға, осы мектептің бастауыш сынып мұғалімі Аманкүл Жанабаеваға, №12 жалпы білім беретін мектебінің қазақ тілі мен əдебиеті пəні мұғалімі Гүлжан Жомартоваға, №1 тірек мектебінің ағылшын тілі пəні мұғалімі Нұржамал Нұрмановаға тақты.

Салтанатты жиын аудандық балалар өнер мектебінің дайындаған концерттік бағдарламасымен тəмамдалды.