Дарынды күйші – Құрметті профессор
Дарыны дара күйші, Қазақстанның еңбек сіңірген мәдениет қызметкері, «Құрмет» ордені мен халықаралық «Түркі қыраны» төсбелгісінің иегері, Жаңаарқа ауданының Құрметті азаматы Мұхаметжан Тілеуханов өнерді дамыту мен насихаттауға сіңірген өлшеусіз еңбегі үшін университет ректоры Айман Мұсаходжаеваның өкімімен Қазақ Ұлттық өнер университетінің Құрметті профессоры атағына ие болды.
Жасампаздыққа жаны құштар жаңаарқалықтар жағымды жаңалықты қуанышпен қабылдады. Солардың қатарында жалпы бұқарамен қоса, ауданның басшылығы да бар екенін айта кеткен жөн.
«Күй шерткенде қара домбыраға тіл бітіретін сіздің ерекше өнеріңізді жерлестеріңіз жоғары бағалап, өзіңізді мақтан тұтады. Сіздің еншіңізге тиген алуан түрлі сыйлықтар мен марапаттардың салмағы мен сапасы да айтарлықтай. Бұның бәрі – табиғатпен берілген бітім-болмысы тым бөлек өнеріңізге деген ыстық ықылас пен зор құрметтің белгісі.
Қазақ Ұлттық өнер университетінің Құрметті профессоры атануыңызбен шын жүректен құттықтаймын!
Отбасыңызға зор денсаулық, ұзақ ғұмыр, бақыт пен береке тілеймін. Өнеріңіз өрге жүзіп, абыройыңыз еселене берсін!» – деп жазды аудан әкімі Юржан Бекқожин өзінің Facebook парақшасында.
Нұргүл ШАМАЕВА.
