Қазақстанның Ұлттық мұрағат қорына Қасым Аманжоловтың сирек фотосуреттері мен құжаттары тапсырылды
Қарағанды облысының мемлекеттік архивінде ақын және жазушы Қасым Аманжоловтың жеке мұрағат қоры таныстырылды. Онда ақынның өмірі мен шығармашылық жолын көрсететін 1911–2021 жылдардағы 90-ға жуық құжаттар, сирек кездесетін фотосуреттер, сондай-ақ бұрын зерттелмеген қолжазбалар жинақталған.
Олардың бір бөлігін архив қорына Қасым Аманжоловтың қызы тапсырды.
– Ақын, жазушы, публицист, журналист, аудармашы және Ұлы Отан соғысына қатысушы Қасым Аманжоловтың жеке мұрағат қоры оның туғанына 110 жыл толуына орай таныстырылды. Құжаттарды жинау үшін біз ҚР орталық мұрағатына барып, Орал қаласының мұрағатымен хат жазыстық. Оның құжаттарының, жарияланымдарының, өлеңдерінің көшірмелері жасалды, — деді «Қарағанды облысының мемлекеттік мұрағаты» КММ директоры Жаңагүл Тұрсынова. – Мен сондай-ақ ақынның қызы Дариғамен кездестім, ол бізге оның құжаттары мен фотосуреттерінің түпнұсқаларын сақтауға және зерттеу мақсатында табыс етті.
Құжаттар негізінен түпнұсқаларда, қолжазбаларда, баспа нұсқаларында, газет жарияланымдары, суреттер, альбомдар мен фотосуреттер түрінде ұсынылған.
– Қасым Аманжоловтың жеке мұрағат қорының құжаттары сұранысқа ие болады, себебі ол өмір сүрген уақытты, оның тағдырын, дүниетанымын, сезімін, эмоциясын көрсетеді, – деп қосты Жаңагүл Тұрсынова.
Қасым Аманжоловтың 110 жылдығына орай Қарағанды облысының мемлекеттік мұрағаты ақынның жеке мұрағатының құжаттарына ғылыми-техникалық өңдеу жүргізіп, «Өмірін өлеңмен өрнектеген» фотоқұжаттық көрме ұйымдастырды, ақын туралы бейнеролик әзірледі.
