Қаралы жиын өтті
Саяси қуғын-сүргін және ашаршылық құрбандарын еске алу күні Қарсақбай кентіндегі «Қызыл террор» мемориалдық кешенінің жанында қаралы жиын өтіп, құрбандар рухына тағзым етілді. Карантин талаптары сақталған шараға аудан әкімінің орынбасары Бағдат БАЙЖАНТАЕВ қатысты.
Нәубет жылдары Қарсақбайға келіп, шыбын жанын сақтап қалғандар аз болмаған. Мыс зауытына жан-жақтан күн құрғатпай жөңкілген босқындарға қол ұшын беру жұмыстары ұйымдастырылып, жұмысшылар саны екі есеге көбейтілген.
1931 жылы Қарсақбайда ашаршылық әкелген қызыл террорға қарсы қарулы көтеріліс болып, оған 43 адам қатысты. Қаралы жиын өткен алаң – саяси қуғын-сүргін мен ашаршылық құрбаны болған жерлестеріміздің рухына қойылған ескерткіш.
Жиналған қауым қанқұйлы жылдардың жазыықсыз құрбаны болған жандарды 1 минут үнсіздікпен еске алды. Аудан әкімінің орынбасары мен кенттегі ақсақалдар кеңесінің төрағасы Айтқали Мәменов мемориалдық кешенге гүл шоқтарын қойды.
– Халықтың төрт миллионға жуығы ашаршылықтан көз жұмды. Жүз мың астам адам қуғын-сүргiнге ұшырап, жиырма бес мың азамат ату жазасына кесілді. Олардың балалары «халық жауының ұрпағы» атанып, өмiр қиындықтарын бастарынан кештi. Адамдар өмірін жалмаған қаралы кезең ел жадында сақталары анық. Құрбандарды еске алу – біздің басты борышымыз, – деді Бағдат Тілеуліұлы.
Жиында сондай-ақ, кенттегі ақсақалдар кеңесінің төрағасы Айтқали Мәменов пен аудандық қоғамдық кеңестің мүшесі Тоңболат Мұқанұлы сөз алып, зұлмат заманның тарихи сабағы туралы сөз қозғады.
Бұдан кейін кент мешітінде құрбандар рухына құран бағышталды.
Гүлзат ИМАНБАЕВА,
мәдениет үйінің әдіскері.
ҚАРСАҚБАЙ кенті.
