Сәтбаев қаласының жас хоккейшілері Қазақстан чемпионы атанды

Сәтбаевтың Yastreby-2009 командасы шайбалы хоккейден балалар-жасөспірімдер командалары арасында ҚР чемпионатында бірінші орынды иеленді. Турнир мамыр айының соңында Нұр-Сұлтанда өтті.

Сәтбаев қаласының әкімі Асқар Ыдырысов чемпиондардың құрметіне салтанатты қарсы алу рәсімін ұйымдастырды.

– Мен сіздердің жеңістеріңізге қуаныштымын және әрқайсыңызды мақтан тұтамын. Қазақстандық спорттың нағыз патриоттары осындай мақсатқа ұмтылған балалардан құрылады. Біздің қаламызда осындай керемет мұз сарайы бар, оның есігі барлық тілек білдірушілер үшін ашық. Мен сондай-ақ хоббилеріңізде сіздерді түсінетін және қолдайтын ата-аналарға алғысымды білдіргім келді. Қазіргі және болашақ спорттық өмірлеріңізге сәттілік пен жеңіс тілеймін! – деді Асқар Ыдырысов.

Yastreby-2009 командасы 2015 жылы «Қазақстан» спорттық-сауықтыру кешенінің мұз сарайы базасында құрылған. Бір жылдан кейін оның жаттықтырушысы Егор Сергеев болып тағайындалды. Оның бастауымен 23 спортшы екі рет Қазақстан чемпионатына қатысты. Сәтбаевтағы хоккей спорты тарихында алғаш рет жас хоккейшілер ақтық ойында Нұр-Сұлтан командасын жеңіп, алтын жүлдегер атанды.

Спортшылар жеңіс оңай болмағанын мойындайды. Тек тұрақты жаттығулар мен командадағы өзара түсіністіктің арқасында қол жеткізген бірінші орын көптен күткен сыйлық болды.

– Хоккей ойнағанды ұнатамын. Мен төрт жылдан бері осы спорт түрімен айналысып келемін. Біздің командамыз өте тату. Жеңіс бізге қиын күрестің нәтижесінде келді. Финалда біз 4:3 есебімен жеңдік. Нұр-Сұлтан қаласының қарсыластары күміс жүлдегер атанды. Балалар мен жаттықтырушымызды жеңісімен құттықтағым келеді, – деді команда қатысушысы Арсений.

Үздік нәтиже үшін қала әкімі жаттықтырушы Егор Сергеевке Құрмет грамотасын табыс етті. Команда 200 мың теңге көлемінде ақшалай сыйлық алды.