Ұлытаудағы танымдық жиын «Қазақ тарихының шырақшылары» деп аталды

Күні кеше «Ұлытау» ұлттық тарихи-мәдени және табиғи қорық-музейінің Сапар орталығында Шоқан Уәлихановтың 190 жылдығы мен Ілияс Есенберлиннің 110 жылдығына орай «Шоқан Уәлиханов пен Ілияс Есенберлин: қазақ тарихының шырақшылары» атты дөңгелек үстел өтті.

Тарихи – танымдық шара қайталанбас екі тұлғаның мерейтойларына арналды. Оған қазақстандық ғалымдар, музей басшылары, өлкетанушылар мен БАҚ өкілдері қатысты. Дөңгелек үстел басында тарихшы ғалымдар Шоқан мен Ілияс мұраларына, еңбектеріне, шығармашылық баға беру мақсатында мазмұнды шараға мән үстейтін ойларымен бөлісті. Мәселен, Л.Гумилев атындағы Еуразия Ұлттық университетінің профессоры, тарих ғылымдарының докторы Мақсат Алпысбес «Шоқанның ғылыми мұрасындағы қазақ халқының ұлттық тарихи ой – танымы», Ө.Байқоңыров атындағы Жезқазған университетінің аға оқытушысы Қабдол Әуезов «Ұлытау – Жезқазған өңіріндегі Алтын Орда дәуірінің ескерткіштерін Шоқан Уәлихановтың зерттеуі», Абай атындағы Қазақ ұлттық педагогика университетінің докторанты Өміртай Еділханұлы «Шоқан Уәлиханов – сөз өнері туралы эстетикалық танымы», Л.Гумилев атындағы Еуразия Ұлттық университетінің докторанты, e-history.kz порталының бас редакторы Алтынбек Құмырзақұлы «Шоқан Уәлихановтың И. Березинге жазған хаты және Алтын Орда жарлықтарының тілдік – дискурстық табиғаты» тақырыбында тартымды баяндамалар жасады.
Дөңгелек үстелді жүргізген модератор Бағлан Оразалы да Шоқан мен Ілиястың мұраларына жете тоқталып отырды. Л.Гумилев атындағы Еуразия Ұлттық университетінің профессоры, философия ғылымдарының докторы, «Шоқан жолдары» қоғамдық бірлестігінің төрағасы Раушан Иманжүсіп Шоқанға арналған экспедиция барысында жинақталған материалдарға ғылыми тұрғыда шолу жасап, тарихи тақырыпта әңгіме өрбітті. Бұдан кейінгі кезекті алған Ұлытау облыстық тарихи-мәдени мұраны сақтау орталығының директоры Мұхтар Бақытұлының сөзі де көкейге қонымды шығып, танымдық шара мазмұнын, тіптен, арттыра түсті. Байыпты басқосу барысында баяндамашылар жиынға қатысушыларды ғылыми негізде тұжырымдалған толғақты пікірлерімен тәнті етті.
Сөз арасында ғалымдар ілкімді іс-шараны ұйымдастырушыларға алғыстарын білдіріп, Ұлытау ауданы орталығынан бір көшеге «Жошы» есімі берілсе деп ұсыныстарын да жеткізді. Содан кейін баяндамада айтылған тың деректер негізінде дөңгелек үстелге қатысушылар атынан қарар қабылданды.

Жиын түйінінде, «Ұлытау» ұлттық тарихи-мәдени және табиғи қорық-музейі басшысының міндетін атқарушы Айболат Рахмания Шоқантанушы ғалымдарға шынайы ризашылығын білдіріп, баяндамашыларға сертификаттар мен естелік сыйлықтарды табыс етті.

Қайрат ЖҰМАБАЙ.