Абай мұрасы – мәңгілік қазына

Ұлытау облысында қазақтың ұлы ақыны, кемеңгер ойшылы, дара тұлға Абай Құнанбайұлының 180 жылдық мерейтойына арналған мәдени-ағартушылық онкүндік өтті. Абай мұрасын ұлықтауға арналған бұл онкүндік 2025 жылдың 1–10 тамызы аралығын қамтыды.

Іс-шаралар легі 1 тамызда Ұлытау ауданының тарихи-өлкетану музейінде «Абай Құнанбаев – 180 жыл» атты көрме-экскурсиямен басталды. Ал 2 тамызда Жаңаарқа ауданының Сәкен Сейфуллин атындағы тарихи-өлкетану музейінде «Әлем таныған Абай» атты жылжымалы көрме өтті. Бұл көрмелердің мақсаты – ұлы ақынның өмірі мен шығармашылығын тереңірек таныту, оның ой-танымының әлемдік деңгейдегі маңызын жастарға жеткізу.
3 тамызда Жезқазған қаласындағы Балалар мен жасөспірімдер кітапханасында өткен «Абай мұрасы» атты поэтикалық марафон жас буынды ақын шығармаларын терең сезініп, оқуға баулыды.
4 тамыз күні Ұлытау облыстық тарихи-археологиялық музейінде «Ұлы Абай және ХІХ–ХХ ғасырдағы қазақ тарихы» тақырыбында танымдық сабақ ұйымдастырылды. Бұл шарада Абай дәуірі мен сол кезеңдегі тарихи оқиғалар арасындағы байланысқа назар аударылды.
Сол күні, 4 тамызда, Ұлытау ауданындағы Абай ескерткішінің жанында танымдық және әдеби-сазды кештермен мерекелік онкүндік ресми түрде ашылды.
Онкүндіктің аясында облыстың барлық аудандары мен қалаларында Абай мұрасына арналған түрлі форматтағы мәдени-көпшілік іс-шаралар ұйымдастырылды. 5 тамызда мемлекеттік қызметшілер арасында облыстық тілдерді дамыту орталығының бастамасымен «ABAI-QUIZ» зияткерлік ойыны өтсе, Ұлытау аудандық кітапханалар жүйесінде «Абай дана, Абай дара қазақта» атты интеллектуалды ойын өткізілді.
6 тамызда Ұлытау аудандық Мәдениет үйінде «Абайды оқы – таңырқа!» атты әдеби-сазды кеш ұйымдастырылды. Бұл кеште жергілікті өнерпаздар Абай әндерін орындап, оқырмандар ақын шығармашылығынан үзінділерді мәнерлеп оқыды.
7 тамызда Ұлытау облыстық әмбебап кітапханасы «Абай жаққан бір сәуле сөнбеу үшін…» атты жыр мен музыка кешіне ұйытқы болды. Ал 8 тамыз күні Сәтбаев қаласындағы Ш.Ділдебаев атындағы Кеншілер Сарайында өзге ұлт жастары арасында «Өлең – сөздің патшасы, сөз сарасы» атты мәнерлеп оқу байқауы өтті. Бұл шараның мақсаты – Абай шығармашылығын әртүрлі этнос өкілдері арасында кеңінен насихаттау, олардың ұлттық рухани құндылықтарға деген құрметін арттыру.
9 тамызда Жаңаарқа ауданының Мәдени-сауық орталығында «Таза мінсіз асыл сөз» атты өлең оқу байқауы өткізілді. Мұнда жас оқырмандар Абай өлеңдерін жатқа оқып, поэзияға деген сүйіспеншіліктерін көрсетті.
Мерейтойлық онкүндік 10 тамыз – Абай күнімен түйінделеді. Осы күні Жезқазған қаласында Абай ескерткішіне гүл шоқтары қойылады. Сонымен қатар, «Абай – дана, Абай – дара қазақта!» атты облыстық ақындар мүшәйрасы өтеді. Халықтар достығы мен мәдениеті үйінің ұйымдастыруымен «Желсіз түнде жарық ай» атты музыкалық танымдық кеш те көрермендер назарына ұсынылмақ. Бұл күн – ұлт руханиятының биік шоқтығы саналатын Абай мұрасының жас ұрпақ санасына сіңуіне ерекше мән берілетін күн болмақ.
Аталған барлық шаралар Абай Құнанбайұлының рухани мұрасын кеңінен насихаттап, өскелең ұрпаққа үлгі етуге, ұлттық бірегейлікті нығайтуға бағытталған. Айта кету керек, осы онкүндік барысында облыс аумағындағы жолаушылар көліктеріне (автобус, маршрут, такси және т.б.) Абайдың нақыл сөздері жазылған арнайы А3 форматындағы парақшалар ілінді. Бұл бастама Абайдың даналық сөздерін халық арасына кеңінен таратуға бағытталған ерекше қадам болды.
Абай мұрасы – қазақ халқының мәңгілік қазынасы. Ұлы ақынның 180 жылдығына арналған осындай ауқымды іс-шаралар легі өңір халқының рухани серпілісіне себеп болып, ұлттық әдебиет пен мәдениеттің жаңа белестерге көтерілуіне ықпал ететіні сөзсіз.

Ізтай БЕЛГІБАЙҰЛЫ.