Ұлытауда тасаттық берілді
Қасиетті жұма күні Ұлытау селосындағы тау баурайындағы өзен жағасында ауыл азаматтары мен мешіт жамағатының ұйымдастыруымен тасаттық берілді. Сауапты іске қолдау көрсетуге аудан əкімі Советбек Медебаев, аудандық мәслихаттың хатшысы Аманжол Мырзабеков, аудандық орталық мешіттің бас имамы Жанболат Рақымбердиев, ауыл ақсақалдары, ауыл азаматтары және мешіт жамағаттары жиналды. Басты мақсат ауыл тұрғындарының тілеуі орындалсын деген ниет еді.
Тасаттық — белгілі бір тілектің орындалу жолында мал сойып, құрбандық шалу.Бұл үрдіске ауыл азаматы Төлеген Садықов мұрындық болып, ілкімді шараның іске асуына дəнекерлік етті. Алдымен, тасаттыққа арналған сиыр малы өзен жағасына əкелініп бауыздалды. Бұдан кейін жиналғандар имамға ұйып, екі рәкәт намаз оқып, дұға тіледі.
Ұйымдастырылған шара барасында Алланың ақ жолымын жүріп, ісімен ниет еткен ауыл азаматтары артылған етті аудан орталығындағы мұқтаж жандарға таратып берді.
Игі шара соңында Ұлытау селосындағы «Тассай» дәмханасында дастарқан жайылып , аудан тұрғындарына дәм берілді.
